Kryeministri egjiptian Mostafa Madbouly falënderoi presidentin turk Recep Tayyip Erdoğan për përpjekjet e Turqisë gjatë mandatit të presidencës me grupin e 8 Vendeve në Zhvillim (D8).
Duke folur në Samitin e 10-të virtual të D8-tës, Madbouly tha se vendi i tij i kushton shumë rëndësi pjesëmarrjes në aktivitetet e organizatës për të forcuar bashkëpunimin midis vendeve anëtare dhe për të arritur interesat dhe qëllimet e përbashkëta.
“Sfidat e mëdha që kemi kaluar kanë theksuar rëndësinë e çështjeve që lidhen me zhvillimin, përfshirë aspektet ekonomike, sociale dhe mjedisore, treguan rëndësinë e sektorëve ekonomikë që mund të arrijnë një rimëkëmbje të shpejtë dhe rëndësinë e investimit në kapitalin njerëzor”, ka thënë Madbouly, sipas një deklarate nga Kryeministria e Egjiptit.
“Vëmendje e veçantë duhet t’i kushtohet promovimit të marrëdhënieve tregtare midis vendeve anëtare”, vuri në dukje ai.
Vendet e D8-tës ranë dakord sot për të rritur bashkëpunimin tregtar dhe për t’i çuar vëllimet e tregtisë së brendshme në të paktën 10 për qind të tregtisë totale të organizatës në dhjetë vitet e ardhshme.
Në samitin e organizuar nga Bangladeshi dhe gjithashtu të ndjekur nga presidenti turk Recep Tayyip Erdoğan, blloku miratoi Udhërrëfyesin Dhjetëvjeçar D8 për periudhën kohore 2020-2030 dhe Deklaratën e Dhaka-s 2021.
Përmes udhërrëfyesit, blloku synon të bëhet më i fortë dhe më i zhvilluar, si dhe të mbështesë zbatimin e strategjive përkatëse dhe programeve të veprimit për të ndihmuar arritjen e axhendës së qëndrueshmërisë 2030 të vendosur nga Kombet e Bashkuara (OKB).
Blloku përfshin Bangladeshin, Egjiptin, Nigerinë, Indonezinë, Iranin, Malajzinë, Pakistanin dhe Turqinë.
