Ministri izraelit i Mbrojtjes, Israel Katz, urdhëroi ushtrinë të mërkurën të parandalojë hyrjen e një konvoji me ndihma humanitare nga Afrika e Veriut në Rripin e Gazës së rrethuar.

Një deklaratë nga zyra e tij tha se Katz kishte urdhëruar ushtrinë të bllokonte hyrjen e atyre që ai i quajti “protestues xhihadistë” nga Egjipti në Gaza.

“Pres që autoritetet egjiptiane t’i pengojnë ata të arrijnë kufirin midis Egjiptit dhe Izraelit dhe të mos i lejojnë të kryejnë provokime dhe të përpiqen të hyjnë në Gaza”, tha Katz.

Konvoji, i cili u nis nga Tunizia më 9 qershor, bashkon aktivistë, mjekë dhe avokatë nga Tunizia, Algjeria, Maroku dhe Mauritania, dhe po transporton ndihma mjekësore dhe ushqimore në Gaza. Rruga e planifikuar kalon nëpër Libi, dhe hyrja në Egjipt duhet të bëhet nëpërmjet kalimit të Salumit, me qëllim arritjen në Refah më 15 qershor.

Egjipti menjëherë filloi zbatimin e urdhrave të lartpërmendura të Ministrit të Mbrojtjes Izraelite.

Media egjiptiane raportoi se forcat e sigurisë egjiptiane arrestuan dhjetëra tunizianë, francezë dhe algjerianë në aeroportin e Kajros për pjesëmarrje në “Konvojin e Këmbënguljes” që u drejtua drejt Gazës.

Media zbuloi se policia egjiptiane bastisi Hotelin Downtown dhe një hotel tjetër në qendër të Kajros, ku po qëndronin anëtarët e delegacionit francez që merrte pjesë në konvoj, përpara se të humbiste kontakti me ta.

Media egjiptiane më parë zbuloi se autoritetet egjiptiane në aeroportin e Kajros filluan arrestimin dhe kthimin e të gjithë atyre që erdhën për të marrë pjesë në konvoj, ndërsa të tjerët që kishin mbërritur tashmë në Egjipt u deportuan.

Avokatja algjeriane Fatiha Rouibi u citua nga media të thoshte se që nga mëngjesi i sotëm, policia egjiptiane ka arrestuar 40 algjerianë, përfshirë tre avokatë, pasi i pengoi ata të hynin në Egjipt pas mbërritjes së tyre në aeroportin e Kajros për t’u bashkuar me konvojin.

Në përgjigjen e saj të parë zyrtare ndaj iniciativës së njohur si “Konvoji i Këmbënguljes”, Ministria e Jashtme egjiptiane tha të mërkurën se asnjë konvoj ose delegacion nuk lejohej të kalonte nëpër territorin egjiptian pa koordinim paraprak me autoritetet përkatëse dhe në përputhje me procedurat e sigurisë në fuqi në zonat e ndjeshme kufitare.

Në një deklaratë, pala egjiptiane theksoi se hyrja në vend po zhvillohej sipas rregullave ligjore dhe të sigurisë të përcaktuara qartë, duke përfshirë marrjen e lejeve të nevojshme përmes kanaleve zyrtare diplomatike.

Ajo shtoi se Egjipti vlerëson solidaritetin arab me popullin palestinez dhe mirëpret iniciativat humanitare, por refuzon anashkalimin e procedurave të përcaktuara. /tesheshi.com/

Subscribe kanalin tonë në Youtube për të mos humbur asnjë video të re
Berati TV Live Kliko

ARTIKUJ TË NGJASHËMMË SHUMË NGA AUTORI