Disa zakone të këqija janë të vështira për t’u ndryshuar. Ekspertët e sigurisë ushqimore shpresojnë të ndihmojnë njerëzit të frenojnë të paktën një zakon të keq – larjen e pulës.
Salmonela e gjetur në produktet e shpendëve kontribuon në 93 milionë raste të sëmundjeve ushqimore çdo vit. Por një përqindje e madhe e konsumatorëve ende nuk janë të vetëdijshëm se nuk duhet të lajnë mishin e shpendëve.
Ndërkohë blogerja e njohur e ushqimit Valbona Lasku ka treguar kujdesin që duhet të kemi kur gatuajmë pulën dhe pse nuk duhet ta lajmë para se ta gatuajmë atë.
“Këshilla kryesore që kemi mësuar ne nga Siguria Ushqimore është të mos lani pulën, dhe kjo nuk është një shaka se njerëzit e marrin pulën dhe e lajnë sikur e fërkojnë. Gjithë këto pika që spërkaten në banakun tonë të gatimit, mund ta marrë domatja, kastraveci, thika, edhe ajo druri i prerjes. Duhet që pasi keni prerë pulën mos të prisni gjë tjetër por ta lani me një solucion. Sepse me ujë nuk ikën ajo se është gjallesë e gjallë, nuk mund të ikë, ajo duhet larë me një solucion të përshtatshëm pastaj të presësh gjëra të tjera, ose të presësh perimet më parë.
Kjo është edhe me mishin e kuq jo vetëm me mishin e pulës, por salmonella jeton në mishin e shpendëve, dhe nëse ti I ndan, një prerëse të ndryshme për mishin një tjetër për perimet, nuk ndodh kontaminimi. Se ajo pika e pulës që po lan mund të shkojë dhe te qumështi që po zien dhe ja ku u sëmure nga qumështi që po pi”, tha Lasku.
Larja ose shpëlarja e pulës rrit rrezikun. Salmonella, Campylobacter dhe baktere të tjera të dëmshme jetojnë në pulën e papërpunuar. Larja ose shpëlarja nuk e largon këtë rrezik, por e përkeqëson atë duke ndihmuar përhapjen e baktereve. Kur shtoni ujë përmes larjes ose shpëlarjes, ju u jepni këtyre baktereve një mënyrë për të udhëtuar në të gjithë kuzhinën tuaj.
Pula tashmë është larë. Prodhimi i sotëm pastron pulën, kështu që nuk ka papastërti, pupla ose ndonjë gjë tjetër mbi të që duhet të lahet.
Ka një mënyrë më të mirë dhe më të sigurt për të gatuar pulën. Nëse shihni diçka në pulë që dëshironi të hiqni qafe, fshijeni atë me një letër të pastër dhe më pas lani duart. Ndani pulën e papërpunuar nga ushqimet e freskëta dhe ato të gatshme. Mbani sipërfaqet të pastra duke i larë me ujë të nxehtë dhe me sapun. Gatimi i pulës në 165°F duke përdorur një termometër ushqimi do të vrasë çdo bakter të rrezikshëm dhe do ta bëjë të sigurt për t’u ngrënë.
