Një nga tre të akuzuarit për vrasjen e gazetares malteze Daphne Caruana Galizia, e cila po hetonte korrupsionin në këtë shtet ishull, pranoi fajin të martën.
Caurana Galizia u vra më 16 tetor 2017, kur makina e saj u hodh në erë.
Vince Muscat u deklarua i pafajshëm në seancën e parë, por ndryshoi mendim pasi u mblodhën prova.
Ai ka qenë në paraburgim që nga dhjetori i vitit 2017, kur së bashku me dy burra të tjerë u akuzuan për planifikimin dhe kryerjen e atentatit.
Dy të pandehurit e tjerë ende deklarohen ë të pafajshëm, raporton Reuters.
Përgjegjësia politike
Vrasja e gazetares me makinë bombë tërhoqi vëmendjen për problemin e korrupsionit në anëtarin më të vogël të Bashkimit Evropian.
Një person i katërt, multimilioneri dhe biznesmeni Yorgen Fenech, i lidhur me qarqet më të larta të qeverisë, dyshohet për urdhërimin e vrasjes dhe akuzohet për bashkëpunim në krim.
Ai vazhdimisht i mohon të gjitha akuzat kundër tij.
I vetëshpallur ndërmjetësues në atë komplot, Melvin Theuma u deklarua fajtor në 2019 në këmbim të faljes.
Muscat kërkoi një zgjidhje të ngjashme, por ajo u refuzua muajin e kaluar.
Burimet gjyqësore thonë se atij i është ofruar një dënim i zbritur.
Muscat nuk ka lidhje me Joseph Muscat, ish-kryeministrin, gjatë mandatit të të cilit u vra Caruana Galizia dhe i cili dha dorëheqjen në dhjetor 2019 në mënyrë që, me fjalët e tij, “të merrte përgjegjësi politike”.
Por miliarderi Fenech ishte një mik i ngushtë i Keith Schembri, ish-shefi i zyrës së kryeministrit Muscat.
Schembri mohon çdo përgjegjësi penale dhe pretendon se ai nuk kishte njohuri për vrasjen ose autorët.
