Emiri i Katarit Sheikh Tamim bin Hamed Al Thani në një bisedë telefonike i uroi Kurban Bajramin mbretit të Arabisë Saudite, Salman bin Abdulaziz dhe Princit të Kurorës, Mohammed bin Salman.
Sipas agjencisë saudite të lajmeve (SPA), Emiri i Katarit zhvilloi një telefonatë me mbretin Salman dhe Princin e Kurorës, Mohammed bin Salman.
Emiri i Katarit u përcolli urimet e tij me rastin e Bajramit që vjen dhe uroi që Bajrami të jetë një mjet i mirësisë dhe prosperitetit për të dy vendet, popujt vëllezër të të dy vendeve dhe botën Islame.
Çfarë ndodhi?
Arabia Saudite, Emiratet e Bashkuara Arabe, Bahreini dhe Egjipti ndërprenë të gjitha marrëdhëniet diplomatike me Katarin më 5 qershor 2017, duke e akuzuar atë për “mbështetje të grupeve terroriste” dhe filluan të vendosnin një embargo ekonomike ndaj këtij vendi.
Katari mohonte akuzat, por kjo situatë shkaktoi një krizë në rajonin e Gjirit.
Përpjekjet për t’i dhënë fund krizës përfunduan me deklaratën në Samitin e 41-të të Këshillit të Bashkëpunimit të Gjirit në janar se vendet që vendosën një embargo ndaj Katarit kishin rivendosur marrëdhëniet diplomatike me Doha dhe kishin hequr embargon.