Të shtëna me armë zjarri janë regjistruar mbrëmjen e sotme në Shkodër.Mësohet se policia ka mbërritur në vendngjarje për të hetuar rrethanat ndërsa nuk raportohet për persona të lënduar.
Gjithashtu bëhet me dije se është qëlluar me pistoletë në drejtim të një automjeti të parkuar i cili dyshohet të jetë në pronësi të Elvis Hoxhës. Në automjetin ndaj të cilit u qëllua janë gjetur katër plumba.
Policia thekson se janë ngritur pika kontrolli dhe po ushtrohen kontrolle në zonë dhe ambiente të ndryshme, ku dyshohet se mund të jenë fshehur autori dhe bashkëpunëtori i tij, drejtuesi i motomjetit.
Njoftimi i policisë:
Shkodër/Informacion paraprak
Rreth orës 20:10, në lagjen Partizani, në Sheshin Rus, nga një person që qarkullonte me një motomjet pa targa është qëlluar me armë zjarri në drejtim të automjetit tip Peugeot të parkuar, në pronësi të shtetasit E. H.
Nga të shtënat janë shkaktuar vetëm dëme materiale në automjetin e shtetasit E. H., si dhe dëmtime të lehta dhe në një automjet të parkuar afër automjetit tip Peugeot.
Pas marrjes së njoftimit shërbimet e Policisë dhe Grupi Hetimor kanë shkuar menjëherë në vendngjarje dhe po punojnë për sqarimin e rrethanave, identifikimin dhe kapjen e autorit dhe të drejtuesit të motomjetit që lëvizte autori.
Ndërkohë janë ngritur pika kontrolli dhe po ushtrohen kontrolle në zonë dhe ambiente të ndryshme ku dyshohet se mund të jenë fshehur autori dhe bashkëpuntori i tij, drejtuesi i motomjetit.