Avionët luftarakë F-35 të Gardës Kombëtare të shtetit të Vermontit në SHBA kanë zbarkuar për herë të parë në aeroportin e Shkupit.
Para uljes, avionët luftarakë fluturuan mbi aeroportin në Petrovac, si dhe mbi kryeqytetin Shkup.
Dy aeroplanë F-35, të cilët janë pjesë e skuadronit 134 luftarak të Gardës Kombëtare të Vermontit, janë pritur në aeroport nga ministrja e Mbrojtjes e Maqedonisë së Veriut, Slavjanka Petrovska.
“Zbarkimi i këtyre avionëve në territorin maqedonas, të cilët përfaqësojnë teknologjinë më të avancuar, është një tjetër dëshmi e lidhjes së pathyeshme që ekziston mes nesh dhe aleatëve të NATO-s”, tha ajo.
Ajo tha se edhe aeroportet në Maqedoninë e Veriut mund të ofrojnë mbështetje për aeroplanët F-35 për misione të ndryshme dhe për sigurinë e hapësirës ajrore të Aleancës.
Siç tha Petrovska, ulja e avionëve F-35 në aeroportin Petrovcit është shembulli më i dukshëm i partneritetit strategjik dhe besimit të ndërsjellë ndërmjet SHBA-së dhe Maqedonisë së Veriut.
Nënkoloneli i Gardës Kombëtare të Vermontit tha se partneritetet afatgjata janë baza që, siç theksoi ai, garantojnë sigurinë kolektive.
“Pikërisht për shkak të anëtarësimit të Maqedonisë së Veriut në NATO, si aleat ne mund të ndajmë sigurinë që vjen nga misionet e patrullimit në hapësirën ajrore dhe vendosja e shpejtë e aftësive të avancuara në platformën F-35, siç e patë sot”, tha ai.
Ai shtoi se Maqedonia e Veriut ofron trajnime dhe burime për aviacionin e NATO-s përmes aeroportit ushtarak në Petrovac dhe poligonit Krivolak, “të cilat ne kemi nevojë për të ruajtur gatishmërinë tonë”.