Presidenti i Turqisë, Recep Tayyip Erdogan, e quajti presidentin e Sirisë “terrorist” dhe tha se është e pamundur paqja në Siri derisa ai është në pushtet.
“Assadi është padyshim një terrorist që ka kryer terrorizëm shtetëror”, tha Erdogan në Tunis, në një konferencë të përbashkët për media me homologun tunizian, Beji Caid Essebsi.
“Është e pamundur të vazhdohet me Assadin. Si mund ta shohim të ardhmen me një president sirian, i cili ka vrarë gati një milion qytetarë të tij”, shtoi Erdogan.
Që prej fillimit të konfliktit civil në Siri, Turqia strehon mbi dy milionë refugjatë sirianë që kanë ikur nga luftimet.
Turqia po ashtu ka rënë dakord në vitin 2015 që koalicioni shumëkombësh, i udhëhequr nga SHBA-ja, të përdorë bazat e saj ajrore për sulme në Siri, kundër militantëve të Shtetit Islamik.
