Presidenti i Türkiyes, Recep Tayyip Erdoğan, tha se Rripi i Gazës është tokë palestineze dhe i bëri thirrje Shteteve të Bashkuara të Amerikës që ta pranojnë këtë fakt.
Duke folur me gazetarët në avionin presidencial gjatë kthimit nga kryeqyteti saudit Riad, ku mori pjesë në një samit të jashtëzakonshëm të vendeve arabe dhe islame, Erdoğan tha se e ardhmja e botës dhe jetët e njerëzve nuk mund të lihen në mëshirën e pesë vendeve me të drejtë vetoje në OKB.
“Gaza, para së gjithash, është tokë e popullit palestinez. Amerika duhet ta pranojë këtë”, tha Erdoğan.
“Nëse (presidenti amerikan Joe) Biden ka një qasje që thotë ‘Gaza nuk është tokë e popullit palestinez, por tokë e këtyre kolonëve pushtues dhe e Izraelit’, atëherë nuk është e mundur që të biem dakord”, shtoi ai.
Po ashtu, ai tha se Türkiye është “vend kyç” për zgjidhjen e krizave në rajon.
“Türkiye është vendi që ofron sugjerimet më të zbatueshme për zgjidhjen e problemeve. Türkiye është vendi kyç për zgjidhjen e krizave dhe problemeve në rajon”, u tha Erdoğan gazetarëve.
“Është i vetmi vend që mund të takohet me të gjitha vendet e gjeografisë sonë dhe të mbledhë palët konfliktuale dhe ndërluftuese në të njëjtën tryezë”, theksoi ai.
Erdoğan shtoi se do të vazhdojë të bisedojë me secilin aktor që dëshiron të kontaktojë Türkiyen për një zgjidhje të sinqertë.
“Përpjekja jonë është të mbrojmë jetën njerëzore, të sigurojmë paqen, t’i japim fund luftërave dhe të fshijmë lotët e të pafajshmëve”, vuri në dukje ai, duke shtuar se pas samitit të Riadit, dëshiron të fillojë një diplomaci intensive telefonike për situatën në Palestinë.
Duke vënë në dukje se Izraeli po kryen krime lufte duke synuar kampet e refugjatëve, spitalet, shkollat, xhamitë, kishat, madje edhe ambulancat në Rripin e Gazës, ai tha se komuniteti ndërkombëtar duhet të ndërmarrë veprime kundër masakrës izraelite në Gaza, duke shtuar se Këshilli i Sigurimit i OKB-së është edhe një herë joaktiv.
Erdoğan theksoi se Hamasi nuk është organizatë terroriste, por një grup njerëzish që luftojnë për atdheun e tyre.
Izraeli ka kryer sulme të pamëshirshme ajrore dhe tokësore në Rripin e Gazës – duke përfshirë spitalet, rezidencat dhe objektet fetare – që nga sulmi ndërkufitar nga grupi i rezistencës palestineze Hamas më 7 tetor.
Të paktën 11.100 palestinezë janë vrarë, duke përfshirë 4.506 fëmijë dhe 3.027 gra. Ndërkohë, numri i të vdekurve izraelitë është rreth 1.200, sipas shifrave zyrtare.
Burimi: AA
