Türkiye theksoi angazhimin e saj për të mos hequr dorë nga të drejtat e saj në Detin Egje dhe për të përdorur ndryshe kompetencat që burojnë nga marrëveshjet ndërkombëtare, deklaroi presidenti turk Recep Tayyip Erdoğan.
“Türkiye nuk do të heqë dorë nga të drejtat e saj në Egje dhe nuk do të përmbahet nga përdorimi i kompetencave që i janë dhënë nga marrëveshjet ndërkombëtare për armatimin e ishujve kur është e nevojshme”, shkroi Erdoğan në Twitter në gjuhën angleze dhe atë greke.
“Turkiye as nuk shkel të drejtat apo ligjin e askujt, as nuk lejon askënd të shkelë të sajat”, shtoi Erdoğan.
Duke kritikuar Athinën për militarizimin e ishujve të Egjeut, të cilët kanë status joushtarak, Erdoğan tha: “Ne i lëmë komunitetit ndërkombëtar të vendosë se çfarë do të thotë të kërkosh 40.000 kilometra juridiksion detar për ishullin Meis, i cili është më pak se 2 kilometra nga territori kontinental i vendit tonë, por më shumë se 600 kilometra nga Greqia në Mesdheun Lindor”.
Për më tepër, Erdoğan lëshoi një paralajmërim për Greqinë për veprimet e saj në Detin Egje, duke i bërë thirrje Athinës që “të shmangë ëndrrat, deklaratat dhe veprimet që do të çojnë në keqardhje, siç bëri një shekull më parë” – duke iu referuar Luftës së Türkiyes për Pavarësi të viteve 1919-1923, e cila i dëboi forcat greke nga Türkiye – dhe për t’i “thirrur mendjes”.
Duke u ndalur te problemet e minoritetit turk në rajonin e Thrakisë Perëndimore të Greqisë, ai shtoi: “Greqia vazhdon të ushtrojë presion mbi pakicat turke në Thrakinë perëndimore, Rodos dhe Kos, duke injoruar marrëveshjet ndërkombëtare, të drejtat universale të njeriut dhe vlerat e Bashkimit Evropian në të cilin është anëtar”.
– “Përdorimi i NATO-s si mjet”
Duke folur për përpjekjet e Greqisë për të përdorur NATO-n dhe vendet e tjera si mburojë në hapat e saj në detin Egje, presidenti turk tha: “Përfshirja e ishujve të çmilitarizuar në stërvitje të ndryshme dhe synimi për përdorimin e NATO-s dhe vendeve të palëve të treta si mjet në këtë paligjshmëri nuk është asgjë pos një përpjekje që do të ketë një fund tragjik”.
Më tej ai tha: “Si një aleat që ka paguar çmimin më të lartë brenda NATO-s, ne i kemi pritur me qetësi provokimet e Greqisë, e cila as që i është përgjigjur ftesave të delegacionit tonë ushtarak për takim në dy vitet e fundit. Megjithatë, shohim se homologu ynë keqinterpreton durimin dhe qetësinë tonë”.
Burimi: AA
