Presidenti turk Recep Tayyip Erdogan do të vizitojë homologun e tij Volodymyr Zelensky në Ukrainë të enjten, 3 shkurt pasi vendosi Turqinë si ndërmjetëse për të lehtësuar tensionet me Rusinë.
Zyrtari turk i tha Reuters se Ankaraja pret që tensionet të zbuten pas takimit në Kiev. Të mërkurën, Ankaraja dhe Kievi thanë se do të nënshkruanin një marrëveshje të tregtisë së lirë dhe marrëveshje të tjera.
Rusia ka mohuar çdo plan për pushtimin e Ukrainës mes shqetësimeve të shumë vendeve perëndimore për vendosjen e më shumë se 100,000 trupave pranë kufirit, por ka kërkuar garanci gjithëpërfshirëse sigurie nga Perëndimi.
Udhëtimi i Erdogan vjen pas vizitave të krerëve të anëtarëve të NATO-s, Britanisë, Polonisë dhe Holandës në Kiev. Turqia ka lidhje të mira me Kievin dhe Moskën, por ka thënë se do të bëjë atë që është e nevojshme si anëtare e NATO-s nëse Rusia pushton.
Ankaraja ofroi në nëntor ndihmën për të ulur tensionet dhe muajin e kaluar burimet diplomatike turke thanë se Rusia dhe Ukraina ishin të hapura ndaj kësaj ideje.
Një zyrtar i veçantë turk, duke folur në kushte anonimiteti, tha se Erdogan do t’u bëjë thirrje të dyja palëve të përmbahen dhe shtoi se Ankaraja dëshiron të vazhdojë bashkëpunimin e saj me të dy vendet “shumë të rëndësishme”.
