19 qershor Sektori i ujësjellës-kanalizimeve (UK) në Shqipëri është përfshirë në reformën e ndërmarrë nga qeveria qendrore, ku 58 shoqëritë UK të mëparshme rajonalizohen në 15 të tilla.
Aktualisht, janë krijuar 12 shoqëri rajonale dhe brenda këtij viti pritet të krijohen edhe 3 shoqëritë e mbetura, duke plotësuar kështu arritjen e objektivit të reformës për rajonalizimin e të gjithë sektorit sektorit UK në vend.
Në këtë kuadër, një ekip i Entit Rregullator të Ujësjellës (ERRU), që ndjek dhe mbështet nga afër këtë proces, realizoi një vizitë pune në shoqërinë rajonale Berat, e cila përfshin në zonën e saj të shërbimit bashkitë: Berat, Dimal, Kuçovë, Poliçan dhe Skrapar.
“Ujësjellës-Kanalizime Rajoni Berat është një nga shoqëritë pararojë në realizimin e këtij procesi dhe që ka treguar një progres evident në drejtim të realizimit të treguesve kryesorë të performancës për periudhën deri në fund të 5-mujorit të këtij viti, si dhe synon të aplikojë për tarifa të reja të unifikuara për të gjithë zonën e shërbimit”, bën të ditur ERRU.
Sipas ERRU, analiza e treguesve të performancës, të aplikimit, detaje specifike të realizimit të procesit dhe të kapërcimit të ndonjë vështirësie për realizimin e saj, ishin çështjet që u diskutuan në këtë takim.
