Në orët e para të mëngjesit një tjetër tërmet goditi Shqipërinë, që duket se nuk ka qenë dhe aq i lehtë sa u raportua fillimisht.
Lëkundjet u regjistruan 15 km në veriperëndim të Shijakut dhe 31 km në veriperëndim të Tiranës, rreth orës 02:40.
Fillimisht u raportua se lëkundjet ishin me magnitudë 3.7, por në bazë të rikalkulimeve rezulton se fuqia e tërmetit ka qenë më e madhe.
Në përditësimin e fundit të tërmetit në aplikacionin EMSC thuhet se tërmeti ka qenë me magnitudë 4.4 sipas shkallës Rihter.
Lëkundjet alarmuan jo pak banorët e Durrësit dhe Tiranës, gjë e cila pasqyrohet edhe në komentet e shumta që janë bërë në aplikacionin e EMSC-së, ku numërohen më shumë se 500 të tillë.
Kjo lëkundje e fortë erdhi pas tre lëkundjeve me fuqi më të vogël, të cilat nuk e kaluan magnitudën 3.0.
Sizmologët dhe ekspertët deklaruan disa javë më parë që pasgoditjet e tërmetit të fuqishëm të 26 nëntorit mund të vazhdojnë për disa muaj me radhë, dhe kjo sipas tyre nuk ka vend për asnjë lloj alarmi.
