Eurodeputetët Kinga Gál dhe Michal Gahler nga Grupi PPE pyetën sot në parlamentin evropian Komisionerin për Zgjerimin, Oliver Varhely për ecurinë që ka bërë Shqipëria sa i përket 15 kushteve të vendosura nga Këshilli Evropian.
” Si po punoni me 15 kushtet e Këshillit Evropian për Shqipërinë” ishte pyetja që u bë gjatë një debati në Komisionin për Punët e Jashtme (AFET) në Parlamentin Europian, ku një pjesë e deputetëve ishin fizikisht në sallë dhe pjesa tjetër ishte në videokonferencë nga distanca. Eurodeputeti David Lega (PPE, Suedi) tha se “ishte shumë i shqetësuar nga përkeqësimi i lirisë sé medias e të shprehjes në Shqipëri ndërkohë që kjo është kusht për çeljen e negociatave. Raportet e Reporterëve pa Kufinj, të Freedom House dhe të Këshillit të Europës po na japin një panoramë të keqe. Dua të di nëse ky problem dhe 15 kushtet specifike u diskutuan në samitin e Zagrebit ku i pranishëm përmes videokonferences ishte edhe zoti Edi Rama”.
Komisioneri Varhely theksoi se ai do të bënte çmos që këto kushte të përmbusheshin. Lidhur me ligjet antishpifje, Varhely tha se qeveria e Tiranës i kishte premtuar se nuk do të vepronte kundër opinionit të Komsionit të Venecias. Gjithashtu Komisioni po ndiqte edhe reformën zgjedhore.