Rrjeti social Facebook mori masa për të parandaluar postimet e shumë llogarive të ushtrisë së Mianmarit, e cila nëpërmjet një grushti shteti rrëzoi qeverinë e zgjedhur.
Në një deklaratë me shkrim, Facebook tha se llogaritë në këtë rrjet që i përkasin ushtrisë së Mianmarit ishin dezinformuese dhe për këtë arsye shpërndarja e përmbajtjeve të këtyre llogarive do të ulet ndjeshëm.
Në deklaratë thuhet se llogaritë nuk do të mbyllen në kuadër të kësaj mase, por se përdoruesit e Facebook-ut do të shohin më pak përmbajtje nga llogaritë e ushtrisë së Mianmarit.
Puçi ushtarak në Mianmar
Ushtria e Mianmarit, pas pretendimeve për mashtrime në zgjedhjet e 8 nëntorit 2020, mori pushtetin më 1 shkurt dhe shpalli gjendje të jashtëzakonshme për një vit.
Më pas u arrestuan presidenti Win Myint dhe ministrja e Jashtme, njëherësh liderja e vendit, Aung San Suu Kyi, si dhe figura të tjera kryesore të partisë në pushtet, Lidhjes Kombëtare për Demokraci (NLD).
Shefi i Shtabit të Përgjithshëm, Min Aung Hlaing, i cili mori administrimin e vendit, premtoi rikthim në zgjedhje demokratike pas përfundimit të gjendjes së jashtëzakonshme, ndërsa liderja Aung San Suu Kyi i bëri thirrje vendit për të protestuar kundër grushtit të shtetit.
Kombet e Bashkuara (OKB), Bashkimi Evropian (BE) dhe shumë vende, duke përfshirë Turqinë, kanë reaguar ashpër ndaj puçit ushtarak.
Kundër grushtit të shtetit në vend filluan protesta më 6 shkurt me kërkesën për kthimin në demokraci, ndërkohë që policia në disa raste ka ndërhyrë ndaj demonstruesve, kurse ushtria ka shpallur shtetrrethim në disa qytete.
