Dhjetëra mijëra persona kanë mbushur sheshin qendror të Londrës për të protestuar vizitën shtetërore të presidentit të SHBA-ve, Donald Trump.
Tubimet nisën qysh në orët e hershme, para se Trump të vizitonte kryeministren britanike, Theresa May në zyrën e saj në Downing Street.
Trump arriti në zyrat e qeverisë britanike nën prani të madhe të policisë, ndërsa protestuesit u mbajtën shumë larg autokolonës së tij.
Protestuesit, shifra e të cilëve ishte disa mijëra, mbanin parulla dhe posterë anti-Trump. Ata më vonë kaluan në hyrjen e lagjes Downing Street, por nuk arritën të afrohen për shkak të kordonit të policisë.
Një balonë “Baby Trump” me lartësi afro 6 metra qëndronte në shesh, në vendin ku automjeti i Trump duhej të kalonte për të arritur në takimin me kryeministren May.
Protestat pritet të vazhdojnë gjatë gjithë ditës me gjithnjë e më shumë njerëz të cilët vazhdojnë t’i bashkohen. Lideri i Partisë Laburiste dhe disa politikanë të tjerë po ashtu pritet t’i bashkohen protestës në sheshin e Parlamentit.