Gjykata e Athinës në Greqi ka dënuar me 8 vite burg një nënë me origjinë shqiptare, nën akuzën e trajtimit çnjerëzor të tre fëmijëve të saj të mitur, 2, 3 e 6 vjeçar.
Ngjarja u bë publike pak ditë më parë në median greke, ndërsa denoncimin e kishte bërë ish bashkëshorti i nënës shqiptare, me profesion marinar. Pas 1 viti udhëtim në detyrë, ky i fundit kishte kërkuar të takojë fëmijët e tij. Ai ishte përballur me skena të rënda, kur kishte parë fëmijët që jetonin në mesin e minjve e buburrecave.
30 vjeçarja me origjinë shqiptare bashkëjetonte me një 54 vjeçar. Ajo u denoncua nga ish i shoqi, ndërsa edhe fqinjët e mbështetën akuzën e dëshmuan se kishin parë gruan t’i nxirrte fëmijët për të lypur në rrugë.
Pak ditë më vonë, policia arrestoi gruan dhe bashkëjetuesin. E pyetur nga hetuesit sesi mund t’i kishte lënë fëmijët në mesin e buburrecave, gruaja i kishte thënë oficerëve se fëmijëve i kishte treguar se buburrecat ishin flutura.
Madje, siç raportoi media greke, edhe gjykatësja e çështjes kërkoi ndalimin e pamjeve filmike të paraqitura si prova për trajtimin çnjerëzor të fëmijëve, duke u shprehur se nuk mund të duronte dot më.
Fëmijët aktualisht qëndrojnë ende të shtruar në spitalin pediatrik në Athinë.