Xherdan Shaqiri vijon të mbetet në qendër të vëmendjes këtë verë. Nëse javë më parë do të spikaste në Botëror me golin ndaj Serbisë dhe me festimin me shenjën e shqiponjës, një gol në debutimin me Liverpulin e ka detyruar trajnerin e tij të ri ta quajë këtë si diçka “jo normale”.

Lojtari zvicerian me origjinë shqiptare shënoi golin e katërt të Liverpulit në fitoren 4-1 ndaj Mançester Junajtedit në Miçigan të SHBA-së.

Ka qenë një gol spektakolar në ndeshjen e vlefshme për International Champions Cup, një prej turneve verorë që u shërbejnë përgatitjes së skuadrave për sezonin e ri.

Jurgen Klopp ka mbetur i befasuar nga paraqitja e lojtarit, aq sa ka deklaruar se kjo nuk është normale pas vetëm katër ditëve në klub.

Tejet i kënaqur me lojtarin dhe me dëshirën e tij për të dhënë më të mirën që në ditët e para me Liverpulin, Klopp është çuditur me adaptimin e shpejtë të Shaqirit me stilin e lojës së Liverpulit.

Shaqiri është një prej katër blerjeve të reja të Liverpulit, së bashku me Alisson, Naby Keita dhe Fabinho.