Ministri i Brendshëm Taulant Balla, gjatë qëndrimit në Londër ku po zhvillon një vizitë zyrtare, ka festuar festat kombëtare të Nëntorit, atë të Pavarësisë dhe Ditën e Çlirimit, me një komunitet shqiptarësh.
Gjatë fjalës së tij në takim, Balla është shprehur se “historia jonë është historia e një kombi të cilit i është dashur të luftojë gjithmonë për lirinë, pavarësinë integritetin dhe dinjitetin tonë kombëtar”.
Më tej ministri veçoi virtytin e mikpritjes së popullit shqiptar, si pjesë të ADN-së së tij. Ndërsa shtoi se Shqipëria sot është krenare për miqësinë dhe aleancën strategjike me Mbretërinë e Bashkuar, SHBA, vendet e Bashkimit Europian dhe të gjitha vendet mike.
“Shtëpia e shqiptarit është e zotit dhe e mikut. Pyesni hebrenjtë si i pritën e si i mbrojtën shqiptarët gjatë Luftës së Dytë Botërore, duke rrezikuar edhe jetën e tyre përballë pushtuesve nazi-fashistë. Bisedimet për anëtarësim në Bashkimin Europian janë një arritje historike, falë përkushtimit ndër vite të të gjitha qeverive shqiptare në këto tre dekada”, nënvizoi ministri.
Më tej ai shtoi se diaspora duhet të gëzojë të drejtën e votës dhe të mbështetet me programe që nxisin kontributin, ekspertizën dhe investimet e tyre.
“Dua t’ju kujtoj regjistrimin e adresës suaj, në mënyrë që ne t’ju ofrojmë më shumë shërbime online nga Shqipëria këtu”, apeloi Balla.
Shqipëria e Britania e Madhe kanë një histori që këtë vit shënoi 101 vite miqësie, tha Balla, duke theksuar kontributin e palës britanike gjatë luftës.
“Oficerët britanikë të ndërlidhjes janë pranë këtyre partizanëve dhe i kanë çmuar lart cilësitë e tyre luftarake në zhvillimin e ardhshëm në teatrin e luftës për Mesdheun”, do të shprehej Kryeministri britanik Ëinston Churchill në vitin 1943″, u shpreh ai. Deklarata diskriminuese me natyrë ksenofobe apo lajme tendencioze nga media të caktuara, janë të papranueshme. E sigurtë është se asgjë nuk mund ta zbehë faktin se miqësia mes dy popujve shqiptar e britanik mbart gjithmonë vlera të jashtëzakonshme”, tha Balla nga Londra.
