Një gjykatë në Finlandë shpalli të premten dy gazetarë nga e përditshmja më e madhe Helsingin Sanomat si fajtorë për publikimin e informacionit të klasifikuar ushtarak, në një rast të rrallë penal të kufizimeve të lirisë së medias në vendin nordik.
Gjykata e Qarkut të Helsinkit dënoi Tuom Pietilainen, autorin kryesor të raportit të vitit 2017 “Vendi më sekret në Finlandë”, ndërsa kolegia e tij Laura Halminen, megjithëse u shpall fajtore, mbeti e pandëshkuar për rolin e saj mbështetës në artikullin e gazetës.
Për vite, Finlanda ka qenë në krye të vendeve me lirinë më të madhe të medias sipas Reporterëve pa Kufi (RSF), por vitin e kaluar ajo ra në vendin e pestë në listën prej 180 vendeve, pjesërisht për shkak të rastit të përmendur.
“Nëse një gjykatë në Finlandë, vendi i renditur më lart sipas indeksit të lirisë së shtypit, ndjek penalisht gazetarët për raportim për çështje të sigurisë kombëtare, çfarë lloj mesazhi u dërgon kjo vendeve të renditura më të ulëta?”, pyetet në deklaratën e RSF, duke shtuar se është një “precedent i rrezikshëm”.
Një raport nga gazeta Helsingin Sanomat publikoi të dhëna dhjetëvjeçare mbi vendndodhjen dhe detyrat e një njësie të inteligjencës së mbrojtjes, ndërsa Parlamenti debatonte nëse do të zgjeronte kompetencat e tij për të monitoruar të dhënat private në rrjetet dixhitale.
Në një deklaratë, gjykata deklaroi se gazeta botoi “informacione në lidhje me shërbimin e inteligjencës ushtarake të shënuara top sekret, për shkak të sigurisë së jashtme finlandeze”.
Gjykata vendosi gjithashtu se të dhënat e publikuara nuk kishin asnjë lidhje me ligjin e diskutuar në Parlament dhe se artikulli i gazetës nuk zbuloi ndonjë problem apo abuzim që do të justifikonte publikimin e tekstit.
Kryeredaktori i Helsingin Sanomat, Antero Mukka tha se ishte i zhgënjyer me vendimin dhe se, pavarësisht dënimit të lehtë, i ishte bërë dëm lirisë së medias.
Gazetarët mund të apelojnë vendimin.
Prokurorët kërkuan një dënim me kusht me burg prej të paktën 18 muajsh për gazetarët dhe kryeredaktorin.
