Do të mbetet gjatë në kujtesë lumturia që ndjemë Natën e Kadrit, në këtë muaj të bekuar të Ramazanit. Të gjithë së bashku, sollëm gëzim në zemrën e një babai që prej 7 muajsh pa vetëm ditë të zeza. Rikthyem buzëqeshjen në fytyrat e fëmijëve të tij, një dhuratë për të gjithë ata që ndihmuan dhe u lutën për familjen Lluka.

Tashmë fëmijët e Xhaviti nuk rrezikojnë të dalin në mesin e katër rrugëve. Shqiptarët i dhuruan një shtëpi të re.

Fëmijët do të mund t’i festojnë ditëlindjet e tyre, do të mund të hanë ushqim pa u shqetësuar për fundin e muajit… sepse shqiptatët i kanë siguruar një pension mujor prej një mijë eurosh.

Tashmë Xhaviti mund të shohë lirisht fëmijët e të vijojë të qëndrojë në krah të Valbonës. Shtëpia e familjes Lluka është fare pranë spitalit ushtarak në Tiranë.

Gjithçka u arrit në një kohë fare të shkurtër, falë një pune të madhe dhe reagimit të jashtëzakonshëm të shqiptarëve anembanë botës.

Po sjellim më poshtë mesazhet e fëmijëve dhe Xhavitit, fill pasi i gëzuam me shtëpinë e tyre të re.

Alteo: Shtëpia është shumë e bukur e mua më pëlqen shumë. Unë kam krevatim tim… shtëpia është e madhe dhe unë do të luaj me Mariglenin. Faleminderit të gjithë shqiptarëve

Marigleni: Më në fund e kemi një shtëpi tonën, kushtet janë shumë të mira, ashtu dhe shtëpia, shumë e bukur. Unë tani kam dhomën time.

Sheidi: Më në fund do të flemë të sigurt… gjëja që na ka mbetur tani, është që të shërohet mami e të vijë në shtëpi. Faleminderit të gjithë shqiptarëve, kudo në botë, që na bënë të lumtur e të sigurt në këtë shtëpi

Xhaviti: Ndjehem shumë i lumtur, pavarësisht situatës që kam. Në këtë vend ku ndodhem… në shtëpinë time. Më duket e pabesueshme, një realitet i tillë, një realitet kaq i shpejtë, ku mu shua një dhimbje e madhe për kalamajtë. Gjej rastin t’ju falenderoj me zemër. Të gjithë emisionin “Shqiptarët për Shqiptarët”, stafin e mësuesve dhe të gjithë shqiptarët anembanë botës, për ndihmën që na dhanë për këtë shtëpi, që ta kemi njëherë e përgjithmonë e që kalamajtë e mi të fusin kokën brenda. Uroj që në këtë muaj të madhërueshëm, Zoti t’ju bekojë. Ishallah don Zoti i madh, që të gjitha lutjet tona të shkojnë për Valbonën, që edhe ajo të na bashkohet në këtë gëzim kaq të madh. (përlotet)