Presidenti i përkohshëm i Sirisë, Ahmed al-Sharaa, tha të enjten herët në mëngjes se mbrojtja e qytetarëve druzë dhe të drejtave të tyre është “prioriteti ynë”, pasi Izraeli kërcënoi të shkatërrojë forcat qeveritare siriane që sulmojnë druzët në Sirinë jugore.
Në fjalimin e tij të parë televiziv që nga sulmet e rënda ajrore izraelite në Damask të mërkurën, Sharaa iu drejtua druzëve, duke thënë: “Ne hedhim poshtë çdo përpjekje për t’ju vënë nën ndikimin e aktorëve të jashtëm.”
“Ne nuk jemi ndër ata që kanë frikë nga lufta. Ne e kemi kaluar tërë jetën tonë duke u përballur me sfida dhe duke mbrojtur popullin tonë, por i kemi vënë interesat e popullit sirian përpara kaosit dhe shkatërrimit”, tha ai, duke shtuar se populli sirian nuk ka frikë nga lufta dhe është gati të luftojë nëse dinjiteti i tij kërcënohet.
Ndërkohë, kolona të forcave të sigurisë siriane dhe transportuesve të blinduar u panë duke u larguar nga zona e Sweida-s të mërkurën në mbrëmje.
Departamenti i Shtetit i SHBA-së i bëri thirrje Sirisë të tërheqë trupat e saj për të lejuar deeskalimin, dhe Sekretari i Shtetit Marco Rubio tha se “të gjitha palët e përfshira” kishin rënë dakord për hapat që do të “i jepnin fund kësaj situate shqetësuese dhe të tmerrshme sonte”. /tesheshi.com/