Qyteti i Beratit ka mirëpritur këtë fundjavë 40 miq të veçantë të ardhur nga të gjitha kontinentet, pjesë e Maratonës “Ultra Maratona Albania-The Hidden Treasure- 220 km” të cilët nisën vrapimin nga qyteti i një mbi një dritareve.
Kryetari i bashkisë së Beratit, Ervin Demo thotë se maratona e nisur në qytetin që ai administron, do të përfundojë në qytetin antik të Butrintit.
Sipas tij, kjo është një mënyrë për promovimin e bukurive natyrore dhe vlerave të trashëgimisë kulturore të vendin tonë.
“Kjo maratonë nisi në qytetin e Beratit dhe pas 6 ditësh garim, përfundon në qytetin antik të Butrintit. Përzgjedhja e Beratit si pikënisje e kësaj maratone është mjaft domethënëse për qytetin tonë. Ne i uruam mirëseardhjen dhe mjaft suksese në iniciativën e tyre për të promovuar sa më shumë bukuritë natyrore të Shqipërisë si dhe vlerat e trashëgimisë kulturore”, -shprehet Demo.
Maratona “Ultra Maratona Albania-The Hidden Treasure- 220 km” vjen si organizim i Albanian Adventures në bashkëpunim me kompaninë prestigjioze gjermane Global Limits.
