Ka nisur mbledhja e deputetëve të opozitës pranë Kryesisë së Kuvendit ku do të mbahet edhe mbledhja e grupit e kërkuar nga Gazment Bardhi.
Në foto shihet se ka mbërritur pranë mjediseve të Kryesisë së Kuvendit, kreu i grupit Parlamentar të PD-së, Gazment Bardhi dhe deputeti Ervin Salianji.
Ndërkohë kësaj radhe shihet se deputetët nuk janë ndaluar nga Garda e Republikës për të hyrë në mjediset e Kuvendit.
Në rendin e ditës, janë shqyrtimi për draftprogramin dhe draftkalendarin e punimeve të Kuvendit për periudhën 27 nëntor-22 dhjetor. Ndërkohë në draftkalendarin e punimeve për këtë periudhë është edhe marrëveshja e firmosur mes Italisë dhe Shqipërisë për strehimin e emigrantëve të ardhur nga Afrika.
“Për ratifikimin e protokollit, ndërmjet Këshillit të Ministrave të Republikës së Shqipërisë dhe Qeverisë së Republikës Italiane, për forcimin e bashkëpunimit në fushën e migracionit”, i depozituar nga Këshilli i Ministrave në datën 17 nëntor. Pas shqyrtimit në komisionet parlamentare, pritet që votimi në seancë plenare për marrëveshjen me Italinë të bëhet në 21 dhjetor.
Kujtojmë se ditën e djeshme, Bardhi kërkoi zhvillimin e mbledhjes së Grupit Parlamentar të enjten e 23 Nëntorit.
“Nesër, e enjte, në orën 13:00 do të zhvillojmë mbledhjen e Grupit Parlamentar në sallën e grupit në Kryesinë e Kuvendit. Ju falenderoj!”, thuhej në mesazhin që Gazment Bardhi u ka drejtuar kolegëve.
