Pjesëmarrësit në Atelienë e Restaurimit, Berat, përveç punës për konservimin e pikturës murale në kishën e “Shën Konstandinit dhe Helenës”, gjithashtu kanë vizituar kantieret e restaurimit në Qendrën Mesjetare të qytetit të Beratit.
Në pikturën murale të kishës “Shën Konstandini dhe Helena” në lagjen Kala në Berat, ka përfunduar procesi i konservimit në skenat “Darka e fundit” dhe “Larja e këmbëve”.
Në këto skena kanë përfunduar procese të tilla si ringjitja e shtresave përgatitore, pastrimi i sipërfaqes së pikturuar, integrimi piktorik dhe konsolidimi i shtresës së pelikulit piktorik.
Kjo atelie do të zgjasë 2 javë dhe do të zhvillohet në datat 24 qershor – 5 korrik. Janë 11 pjesëmarrës nga Shqipëria, Kosova dhe Spanja që marrin pjesë në Atelienë e Restaurimit.
Pjesëmarrësit gjatë këtyre ditëve do shkëmbejnë eksperienca dhe do specializohen në njohje e vlerave të rralla të trashëgimisë sonë kulturore, materiale e shpirtërore.
