Në prag të çeljes së sezonit turistik 2019, DRKK-Berat veç mirëmbajtjes dhe pastrimit të vegjetacionit është duke u marrë edhe me zëvendësimin e tabelave informuese pranë monumenteve të kulturës. Tabelat me përshkrimin rreth monumenteve u vijnë në ndihmë turistëve në njohjen historike dhe arkitekturore të tyre, por shpesh bëhen pjesë e sulmeve vandale.
Gjatë ditës së sotme punonjësit e mirëmbajtjes Berat vijuan punën sistematike në pastrimin nga vegjetacioni në rrugicat e lagjes Kala e cila gjatë muajve të pranverës bëhet akoma më problematike. Ata kanë ndjekur itinerarin e pastrimit nga rrugica pranë banesës Haxhistasa dhe përgjatë deri në rrugën që të çon në pikën panoramike të qytetit.
Gjithashtu punonjësit e mirëmbajtjes së DRKK Berat kanë bërë dhe pastrimin e vegjetacionit dhe mbetjeve urbane përgjatë itinerarit turistik në lagjen Kala. Mirëmbajtja e monumenteve dhe hapësirave rreth tyre mbetet një nga sfidat e përditshme të punonjësve që kërkon mbështetjen dhe ndërgjegjësimin e qytetarëve në mbajtjen pastër të mjediseve për një imazh më dinjitoz ndaj mijërave turistë që mbushin kalanë çdo ditë.
