Në kalanë e Beratit, një ndër pikat kryesore turistike të qytetit tashmë është rivendosur flamuri kombëtar në një strukturë mbi 20 m të gjatë moderne dhe të denjë për vlerën që mbart ky vend.
Kryetari i bashkisë Berat, Ervin Demo shprehet se rivendosja e flamurit kombëtar në një strukturë të re në një nga pikat më atraktive të qytetit, tek “Tabia” është një gjë e vogël por me zemër të madhe.
“Gjëra të vogla me zemër të madhe. Rivendosëm flamurin kombëtar në një nga pikat më atraktive të qytetit, tek “Tabia”. Për flamurin u përshtat një strukturë e re, mbi 20 m e gjatë, sipas të gjitha parametrave dhe standardeve teknike por edhe estetike”, shprehet Demo.
Kryetari Demo shprehet se kalaja e Beratit e cila është qendra turistike e vendit ishte lënë në harresë për një kohë të gjatë, por tashmë kjo zonë do marr jetë duke mirëpritur turistë vendas dhe të huaj.
“Kalaja, qendra më turistike e qytetit, që i jep identitet të gjithë shqiptarëve ishte lënë pas dore për një kohë të gjatë por ashtu siç tani valëvitet flamuri i shqiponjës, ashtu do të marrë jetë kjo zonë duke sjellë vizitorë jo vetëm nga Shqipëria por nga gjithë bota”, tha kryetari Demo.