Skip to content

Fqinji me Shqipërinë rikthen maskat

Ndajeni këtë artikull me të tjerë duke klikuar ikonat më poshtë

Autoritetet shëndetësore malazeze, për shkak të rritjes së numrit të të infektuarve me koronavirus, katër muaj pas shfuqizimit vendosën masa të lehta epidemiologjike, të cilat do të shtrëngohen nëse vijon trendi i rritjes.

Mbajtja e maskave mbrojtëse për 14 ditët e ardhshme do të jetë e detyrueshme në të gjitha institucionet e administratës publike dhe në dyqane, farmaci, aeroporte, pika karburanti, stacione hekurudhore dhe autobusësh.

Deri më tani, maskat ishin të detyrueshme vetëm në objektet e kujdesit shëndetësor dhe transportin publik.

“Nëse këto masa nuk sjellin përmirësim të situatës në periudhën e ardhshme, do të pasojë mbajtja e detyrueshme e maskave në të gjitha hapësirat e mbyllura”, tha Igor Galiç, drejtor i Institutit Malazez për Shëndet Publik.

Ai u bëri thirrje qytetarëve që të vaksinohen të gjithë ata që nuk e kanë bërë këtë deri më tani dhe vuri në dukje se varianti aktual i llojit të virusit Corona – Omicron po përhapet me shpejtësi, por paraqet një pasqyrë klinike më të lehtë te pacientët dhe ka një shkallë më të ulët të vdekshmërisë.

Galiç përkujtoi se 13 persona kanë vdekur në dy javët e fundit, pesë prej të cilëve janë vaksinuar, por me “status të papërshtatshëm imunizimi”.

“Në dy javët e fundit kanë vdekur 13 persona, tetë prej të cilëve nuk ishin vaksinuar fare”, tha Galiç.

Mosha mesatare e personave të vdekur të vaksinuar ishte 75 vjeç.

Në javën e fundit, Mali i Zi regjistroi mbi një mijë infeksione të reja në ditë. Midis tyre, siç është paralajmëruar më parë, janë nga 5 deri në 10 për qind e turistëve.

Aktualisht, pak më shumë se 6 mijë njerëz në Mal të Zi janë të infektuar.

Ndajeni këtë artikull me të tjerë duke klikuar ikonat më poshtë