Inflacioni, treguesi i çmimeve të produkteve dhe shërbimeve, vijon të jetë mbi mesataren historike.
Gjatë muajit shkurt, sipas institutit të statistikave, ritmet e rritjes u frenuan, ndërsa inflacioni arriti në 7.1%, nga 7.2 që ishte në muajin janar.
Peshën më të madhe e mban grupi i ushqimeve, i cili ka shënuar një rritje dyfish, krahasuar me grupet e tjera me 13.5%, në raport me të njëjtin muaj të një viti më parë.
Brenda këtij grupi, produktet e bulmetit kanë shënuar shtrenjtimin më të ndjeshëm.
Rritje e çmimeve është shënuar edhe në pajisjet e shtëpisë, hotele, restorante, energji dhe transport.
Për të katërtin muaj me radhë, inflacioni po shënon tendenca rënëse, por serish ai konsiderohet i lartë.
