Në një lëvizje të paprecedentë që pasqyron tensionet e rritura të sigurisë në Evropë, Mbretëresha Máxima e Holandës është regjistruar zyrtarisht si rezerviste në ushtrinë holandeze. Ky vendim i monarkes 54-vjeçare vjen në një moment kritik, kur vendet evropiane po përpiqen të forcojnë kapacitetet e tyre mbrojtëse dhe të rrisin numrin e personelit ushtarak.
Mbretëresha ka filluar tashmë një program intensiv trajnimi ushtarak në Breda, i cili përfshin përgatitje teorike dhe fizike. Imazhet e publikuara nga Shtëpia Mbretërore tregojnë mbretëreshën duke u ushtruar në ngjitjen e mureve, qitje dhe stërvitje mbijetese në ujë. Ndonëse aktualisht mban gradën e ushtarës së thjeshtë, pas përfundimit të trajnimit asaj do t’i jepet grada e nënkolonelit.
Si rezerviste, monarkia do të punojë me kohë të pjesshme dhe mund të mobilizohet në raste emergjencash kombëtare apo konflikteve të mëdha për të mbështetur trupat profesioniste. Ky gjest i Máxima-s, e cila gëzon një popullaritet të lartë, interpretohet si një mesazh i fortë mbështetjeje për mbrojtjen kombëtare.
Holanda po planifikon investime masive në ushtri, duke synuar të arrijë 3.5 për qind të PBB-së për mbrojtjen. Ky veprim pritet të ketë një ndikim të ngjashëm me “efektin Amalia”, ku regjistrimi i vajzës së saj, Princeshës së Kurorës, çoi në dyfishimin e aplikimeve në Kolegjin e Mbrojtjes.
Tradita ushtarake është e rrënjosur thellë në familjen mbretërore holandeze. Mbreti Willem-Alexander ka shërbyer në të gjitha degët e forcave të armatosura, ndërsa Princesha Amalia sapo u gradua kaporale.
Megjithatë, vendimi i Máxima-s për t’u stërvitur në moshën 54-vjeçare është i veçantë dhe synon të normalizojë rolin e rezervistit për të gjitha grupmoshat. Tendenca e përfshirjes së familjeve mbretërore në ushtri po vërehet në mbarë Evropën.
Nga Princesha Leonor në Spanjë te Victoria e Suedisë, trashëgimtarët e fronit po rreshtohen në radhët e forcave të armatosura, duke sinjalizuar një epokë të re ku mbrojtja e kontinentit është bërë prioritet kryesor për të gjithë, përfshirë edhe nivelet më të larta të monarkisë. /tesheshi.com/
