Ka zgjatur vetëm pak muaj arratia e 49-vjeçarit, Besnik Pjetri i cili vrau me armë zjarri ish-vjehrrin dhe ish-kunatin e tij në Lezhë.
Ai u kap nga forcat Renea në një banesë të braktisur në fshatin Kaçinar të Mirditës. Këto janë momentet kur efektivët e forcave speciale prangosin 49-vjeçarin, i cili nuk bëri rezistencë gjatë arrestimit.
Operacioni i koduar “Fundi i arratisë” u zhvillua pas kërkimeve të pandërprera dhe ndjekjes intensive nga ana e hetuesve, të cilët arritën të lokalizonin vendin ku fshihej autori i vrasjes së dyfishtë. Kjo falë bashkëpunimit dhe me strukturat e inteligjencës informative.
Krimi i rëndë ndodhi mbrëmjen e 30 gushtit në fshatin Grykë Zezë, ku 49-vjeçari Besnik Pjetri qëlloi për vdekje 56-vjeçarin Pjetër Perjaku dhe djalin e tij, 32-vjeçar Gent Perjaku.
Viktimat sapo ishin kthyer nga Italia pasi kishin një dasmë në vendlindje. Ndërsa shkak për vrasjen u bënë konfliktet e vazhdueshme mes familjes Perjaku dhe autorit pas divorcit. Kjo pasi vrasësi pretendonte se ata i kishin borxhe të pakthyera dhe se nuk e lejonin të takonte vajzat.
Lezhë / RENEA kap dhe vë në pranga një shtetas shumë të kërkuar për vrasje të dyfishtë me armë zjarri.
Finalizohet operacioni policor i koduar “Fundi i arratisë”, i zhvilluar në kushte të vështira terreni dhe atmosferike.
Operacioni, i finalizuar si rezultat i ndërhyrjes profesionale të shërbimeve të RENEA-s dhe punës gjurmuese-policore të strukturave hetimore dhe operacionale të Policisë së Lezhës.
Lokalizohet në një banesë të braktisur në Kaçinar, Mirditë, kapet dhe vihet në pranga 49-vjeçari i shumëkërkuar për vrasje të dyfishtë me armë zjarri. I ndaluari vrau babanë dhe vëllanë e ish-bashkëshortes së tij, më datë 29.08.2022, në banesën e tyre, në Grykë-Zezë, Lezhë.
Shërbimet e Policisë së Lezhës, në vijim të punës intensive gjurmuese-policore, në bashkëpunim me Prokurorinë pranë Gjykatës së Rrethit Gjyqësor Lezhë, për kapjen dhe vënien në pranga të autorit të shumëkërkuar të vrasjes së dyfishtë, me armë zjarri, të ndodhur më 29.08.2022, në Grykë-Zezë, Lezhë, ku u vranë shtetasit P. P., 56 vjeç dhe G. P., 32 vjeç (babai dhe vëllai i ish-bashkëshortes së autorit), mbështetur nga inteligjenca informative, si dhe falë ndërhyrjes profesionale nga shërbimet e RENEA-s, organizuan dhe finalizuan operacionin policor të koduar “Fundi i arratisë”, të zhvilluar në një terren me kushte tejet të vështira gjeografike dhe atmosferike.
Si rezultat i këtij operacioni, falë kërkimeve të pandërprera dhe ndjekjes intensive, duke përdorur forma dhe teknika speciale hetimi, u bë i mundur lokalizimi në një banesë të braktisur, në fshatin Kaçinar, Mirditë, si dhe kapja e vënia në pranga e shtetasit:
– B. P. (P.), 49 vjeç, banues në Troshan, Lezhë.
Gjykata e Rrethit Gjyqësor Lezhë i ka caktuar 49-vjeçarit, në mungesë, masën e sigurisë “Arrest në burg”, pasi nga veprimet hetimore, të kryera nën drejtimin e Prokurorisë së Lezhës, rezulton se 49-vjeçari, më datë 29.08.2022, për shkak të një konflikti me familjarët e ish-bashkëshortes së tij, ka vrarë me armë zjarri shtetasit P. P. dhe G. P. (babai dhe vëllai i ish-bashkëshortes së tij).
Materialet procedurale i kaluan Prokurorisë pranë Gjykatës së Rrethit Gjyqësor Lezhë, për veprime të mëtejshme.
