Anija e mallrave Rubymar, e cila u sulmua muajin e kaluar, u mbyt në Detin e Kuq jugor, tha të shtunën qeveria e njohur ndërkombëtarisht e Jemenit.
Një deklaratë e qeverisë tha se anija u mbyt të premten mbrëma dhe paralajmëroi për një “katastrofë ekologjike”. Anija mbante më shumë se 41,000 ton pleh kur u sulmua, siç ishte njoftuar më parë nga Komanda Qendrore e SHBA.
Rebelët Houthi të Jemenit kanë sulmuar anijet tregtare në rajonin e Detit të Kuq që nga mesi i nëntorit, duke pretenduar se po veprojnë në solidaritet me palestinezët në Gaza. Të hënën, një ekip i qeverisë jemenase vizitoi Rubymar, një anije mallrash me flamur belizean në pronësi të një kompanie britanike, dhe tha se ishte fundosur pjesërisht dhe mund të fundosej brenda disa ditësh.
Shtetet e Bashkuara të Amerikës njoftuan më parë se sulmi dëmtoi ndjeshëm anijen e ngarkesave dhe shkaktoi një njollë nafte 29 kilometra të gjatë, shkruan Reuters.
Një udhëheqës i lartë Houthi ka thënë se ai mban kryeministrin britanik Rishi Sunak dhe qeverinë e tij përgjegjës për fundosjen e anijes së ngarkesave në pronësi britanike Rubymar.
Mohammed Ali al-Houthi, kreu i Komitetit Suprem Revolucionar Houthi në Jemen, gjithashtu postoi në Twitter: “Sunak ka një shans për të rimarrë Rubymar duke lejuar kamionët e ndihmës në Gaza”.