Kreu i Bindjes Demokratike, Astrit Patozi shprehet se do të vijojë ta mbështesë reformën në drejtësi, edhe pse sipas tij ka shumë defekte.

Përmes një postimi në “Facebook”, Patozi argumentoi se “më mirë një reformë problematike, sesa një drejtësi e kalbur”.

Sipas tij, sot ka më shumë mundësi për konsensus në mbështetje të reformës në drejtësi, me gjithë problemet e saj, nëse duam që një ditë të ndëshkohen “zullumqarët e mëdhenj të politikës”.

“GAJRET, O BURRA, DERI MË 25 PRILL! E kemi mbështetur që në fillim dhe do të vijojmë ta mbështesim reformën në drejtësi deri në fund, edhe pse e dimë që ajo ka plot defekte, të qëllimshme ose jo, pak rëndësi ka. Sepse mendojmë që më mirë një reformë problematike, se sa një drejtësi e kalbur dhe e pareformuar, e cila nuk preket, por mbetet e pandryshuar. Edhe merakun e atyre, që thonë se qeveria e ka kapur si gjithmonë dhe nuk e lë të ngrejë kokë drejtësinë, e kuptojmë si shqetësim të drejtë. Sepse kemi pasur një histori të hidhur me këtë temë për dekada me radhë. Por puna është se të njëjtët njerëz të shqetësuar po thonë se kjo qeveri i ka ditët e numuruara dhe se ajo do të rrëzohet më 25 prill.  Ndaj e mira do të ishte të bënim gajret edhe 2 muaj. Se me rregull treshi i bie që shumë shpejt të shikonim se si ndëshkimi i drejtësisë do të binte në radhë të parë mbi Edi Ramën dhe të korruptuarit e tij në 8 vjetët e fundit. Dhe ne nuk mërzitemi aspak, në rast se kjo kohë do të vijë. Për të tjerët, nuk e vëmë dot dorën në zjarr. Ndaj edhe mendojmë se sot ka mundësi për më shumë konsensus në mbështetje të reformës në drejtësi, me gjithë problemet e saj, në rast se duam që një ditë të ndëshkohen realisht zullumqarët e mëdhenj të politikës.”

Subscribe kanalin tonë në Youtube për të mos humbur asnjë video të re