Gazetari Ergys Kavaja ka denoncuar ditën e sotme drejtuesin politik të Partisë Demokratike në qarkun e Shkodrës për zgjedhjet e 25 prillit, Helidon Bushati, që e ka kërcënuar dhe i ka folur në mënyrë fyese në një bisedë telefonike.
Në një postim në Facebook, Ergys Kavaja thotë se në 15 vite si gazetar nuk është kërcënuar kurrë as ai as familja e tij, pavarësisht se ka pasur mendime të ndryshme me personalitete të politikës.
“Dua të denoncoj publikisht dhe pa asnjë rezervë sjelljen kërcënuese, fyese dhe denigruese të Drejtuesit Politik të PD në Qarkun Shkodër Helidon Bushati ndaj personit tim! Sot në drekë mora një telefonatë nga Deputeti i zgjedhur i Shkodrës Helidon Bushati, i cili nuk më lejoi as ta përshëndesja pasi vijoi me një lum fyerjesh banale dhe kërcënime për mua dhe familjen. Në 15 vite si gazetarë në Shkodër jam përballur me shumë ngjarje, zhvillime apo personalitete të politikës me të cilët kemi pasur edhe mendime të kundërta por asnjëherë dhe askush nuk ka guxuar të mbërrijë në kërcënime për mua dhe familjen time!
Nuk e kam ndërmend të stepem dhe të anashkaloj asnjë sjellje të tillë e cila nuk i shkon aspak për shtat staturës së një Drejtuesi Politik dhe Deputeti të një qyteti si Shkodra. Vetëm dy ditë më parë ishte dita e lirisë së medias e unë zgjedh gjithmonë të jem i lirë pavarësisht çdo kostoje. Nëse dikujt nuk i pëlqen kjo atëherë e ftoj të përballemi në rrugë ligjore. Më poshtë po publikoj materialet që kanë sjellë “çmendurinë” e Helidon Bushatit”, shkruan Kavaja.
Pas denoncimit të gazetarit Ergys Kavaja, ka ardhur dhe reagimi i deputetit tashmë të zgjedhur në Shkodër, Helidon Bushati, i cili kërkon ndjesë dhe mirëkuptim, duke shtuar se dhe ai është njeri prej gjaku dhe mishi.
Bushati sqaron më tej se ai ka qenë gjithmonë mbështetës dhe mik i gazetarëve, por në rastin në fjalë ai është përfshirë emocionalisht.
“Në formimin tim dhe në edukaten time qytetare që rrjedh nder breza, nuk ka vend per fyerje dhe presione. Ndaj askujt. Jam dhe do te jem Helidoni që të gjithë më njohin.
Fatkeqësisht, ndodh të jem edhe unë njeri gjaku dhe mishi. Njeri i emocioneve, sidomos kur luftoj dhe e dua të miren. E aq më teper, kur kjo e mirë tenton të sfumohet në dëm të Shkodres. Në dëm të këtij qyteti që duhet të fitojë mbi të keqen.
U perfshiva emocionalisht në një situatë të tillë me gazetarin Ergys Kavaja, të tejkalimit të caqeve dhe të thyrjes së etikes. Prandaj, dua te jem i njëjti Helidon që të gjithë më njohin, dhe ndjesa ime eshte e sinqertë. Kam qene dhe do të mbes gjithmone miku i të gjitheve, dhe i gazetarëve.
Kërkoj ndjesë dhe mirëkuptim. Në çdo moment, perballë kujtdo, le të jete e mira që e mund të keqen,” deklaroi Bushati.
(E.H/Faxweb.al)
loading…
/faxweb