Sadik Sula, një ish ushtarak i dalë në pension në kohën e ngjarjes së Gërdecit, dëshmoi në Gjykatë në procesin ndaj ish-ministrit të Mbrojtjes, Fatmi Mediu.
Ai rrëfen procesin e punës që kryhej nga ai dhe të tjerë, ndërsa shprehet se pranoi të bënte këtë punë për shkak të vështirësisë ekonomike. Siç mëson gazetarja, Blerina Cene, ish-ushtaraku ka dëshmuar se ka parë fillimisht flakët në një karrocë të salduar, e cila tërhiqej nga një djalë, që sipas tij ndërroi jetë.
Tragjedinë e përkufizon si gabim njerëzor, ndërsa imazhet e momentit ku nisën flakët e përshkruan kështu:
“Mora vesh përmes 3 miqve të mi, kontaktova me Petrit Bekoharin. Pas një jave më kthehet përgjigje dhe vazhdova punë. Detyra ime ishte të hiqja degaret nga predhat, kisha punë të veçuar. Ditën e ngjarjes ishim rreth 60 punonjës në fabrikë. Dëgjoj një punëtor duke bërtitur “Baruti u ndez”. Dola pashë një djalë të ri pranë karrocës që na kishin thënë se sapo ishte salduar, me sa duket pasi hodhi dy tre thasë, ajo filloi ndezjen. Pastaj u dëgjua një shpërthim. Pranë ishin rreth 50m 4 kontenier me barut. Edhe në shesh kishte sasi të madhe baruti të hedhur. Dy javë punova aty, pasi pash situatën kisha vendosur që 1 muaj të punoja aty. Nuk ikja dot direkt pasi e kisha kërkuar vetë punën. Fëmijët i kisha në shkollë, vetë e gruan pa punë, 150 mijë lekë të vjetra merrja pension. Kur pash zjarrin, tek karroca e salduar, ishte një djalë që ndoshta ka qenë bërë gati për ta shtyrë, ai vdiq, u shtrimë në tokë. Jemi djegur nga pas duke qenë se flakët vinin pas nesh. Pashë me sy flakët dy metër mbi karrocë. Për një kovë uji ndodhi ajo që ndodhi po të ishte kapur menjëherë. Flaka sipas meje nisi për një gabim njerëzor, ai ishte aktivitet privat, nuk kam parë zyrtar shtetërorë. Unë isha i punësuar në privat në atë fabrikë”.
Në proces do vijojnë të japin dëshmi disa dëshmitarë të tjerë të thirrur nga SPAK.
