Ministrja e Punëve të Jashtme dhe Diasporës së Kosovës, Donika Gervalla, tha se Rusia ka nisur një sulm hibrid ndaj Kosovës.
Sipas saj, sulmi hibrid vjen pas njoftimit se Kosova do të mbështesë Ukrainën me pajisje ushtarake.
“Sot Rusia sulmoi Kosovën me një sulm hibrid, pas njoftimit tonë për mbështetjen e Ukrainës në formën e pajisjeve ushtarake, në mbrojtjen e saj të justifikuar kundër agresionit gjenocidal rus. Nga gjenocidi i Serbisë ndaj Kosovës e dimë se gjenocidi mund të ndalet vetëm me mjete ushtarake”, ka shkruar Gervalla në platformën X.
Lufta për paqe
Në konferencën dyditore Defence24 Days, e cila filloi të hënën në Varshavë, Gervalla deklaroi se “paqja në Evropë mund të sigurohet vetëm nga një ndalesë e përbashkët e Rusisë dhe Serbisë”.
Në delegacionin e Kosovës, me Gervallën është edhe ministri i Mbrojtjes së Kosovës Ejup Maqedonci.
“Meqenëse jam i vetëdijshëm se lufta në Ukrainë kërcënon sigurinë e përgjithshme të Evropës, theksova se Kosova do të vazhdojë të ofrojë mbështetje të pakursyer për Ukrainën në kuadër të kapaciteteve tona kombëtare”, tha Maqedonci.
Në mars, ministri i Kosovës mori pjesë në takimin e Grupit të Kontaktit për Mbrojtjen e Ukrainës, në bazën ushtarake Ramstein në Gjermani, ku tha se “Kosova mbetet e palëkundur në mbështetjen e saj për luftën e drejtë të popullit ukrainas”.
Gjatë takimit të përmendur, ai njoftoi se së shpejti në Ukrainë do të dërgohet pakoja e parë e mbështetjes ushtarake, e përbërë nga kamionë taktikë, automjete taktike dhe autoblinda ushtarake.
“Përveç kësaj, unë njoftova koordinimin dhe përgatitjen e paketës së dytë të mbështetjes ushtarake, e cila përbëhet nga mijëra predha mortajash që së shpejti do të dërgohen në Ukrainë, në mbështetje të njësive të ushtrisë ukrainase në rritjen e fuqisë indirekte të zjarrit”, tha ai më herët në një postim në rrjetin social Facebook.
