Deputeti i Partisë Demokratike, Agron Gjekmarkaj, ka bërë një thirrje publike për ndërhyrje urgjente në zonën pranë Kishës së Shën Ndout në Laç, e cila prej dy vitesh vijon të qëndrojë e dëmtuar nga zjarret që shkrumbuan kurorën e gjelbër dhe pishat përreth.
Në një reagim në rrjetet sociale, Gjekmarkaj kritikon institucionet për mungesën e veprimit dhe thekson se deri më sot nuk është ndërmarrë asnjë masë për pastrim apo për mbjellje të reja.
Postimi i Deputetit Agron Gjekmarkaj:
Thirrje për ndërhyrje urgjente në zonën pranë Kishës së Shën Ndout, Laç
Kanë kaluar tashmë dy vite nga djegia masive e pishave dhe e gjithë kurorës së gjelbër pranë Kishës së Shën Ndout në Laç, por asnjë masë nuk është marrë deri më sot, as për mbjelljen e pishave të reja, as për pastrimin e drurëve të djegur apo mbetjeve të tjera.
Kjo gjendje është e papranueshme, sidomos duke pasur parasysh se qindra mijëra besimtarë dhe turistë të huaj vizitojnë çdo vit këtë vend të shenjtë, i cili përveç vlerës fetare, ka edhe rëndësi të madhe historike e mjedisore.
I bëj thirrje Ministrisë së Mjedisit, Bashkisë së Kurbinit dhe institucioneve përgjegjëse të marrin masa të menjëhershme për:
• Pastrimin e zonës nga mbeturinat dhe drurët e djegur;
• Hartimin e një projekti rehabilitimi të gjelbërimit me pisha dhe bimësi vendase;
• Garantimin e mbrojtjes së mjedisit përreth këtij vendi të shenjtë.
Ruajtja e natyrës dhe e shenjtërisë së këtij vendi është detyrim moral dhe qytetar.
