Një varr masiv me 50 kufoma për të cilët dyshohet të jenë vrarë nga organizata terroriste DAESH u gjet afër rajonit Rashad në jug të provincës së Kirkukut në Irak.
Duke folur për AA, Komandanti i Operacioneve të Kirkukut, Gjeneral Lejtnant Saad Harbiye, deklaroi se një varr masiv me trupat e 50 personave të vrarë nga DAESH u gjet në pjesën rurale të rajonit Rashad pranë qytetit Hawija.
Ai tha se varri masiv u zbulua gjatë operacioneve të Forcës Federale të Policisë së Irakut në rajon, duke shtuar se kanë filluar punimet për nxjerrjen e kufomave.
Harbiye deklaroi se ende nuk dihet saktësisht se kujt i përkasin kufomat, por tha se hetimet në lidhje me identifikimin kanë filluar.
Ish-kryeministri irakian Haider al-Abadi njoftoi fitoren mbi organizatën terroriste DEASH më 9 dhjetor 2017.
Megjithëse kanë kaluar tre vjet që kur DAESH u dëbua nga rajoni dhe qytetet u morën përsëri nën kontroll, sulmet e organizatës vazhdojnë, veçanërisht në zonat rurale të provincave Kirkuk, Diyala, Mosul, Salahaddin dhe Anbar.
AA