Demonstrata u mbajtën në Sheshin e Lirisë në Tbilisi, kryeqytetin e Gjeorgjisë, ku morën pjesë mijëra qytetarë që kërkuan lirimin e ish-presidentit Mikheil Saakashvili, i cili u arrestua më 1 tetor pasi u kthye në vend.
Mijëra njerëz dolën në rrugët e Tbilisit duke kërkuar lirimin e Saakashvilit, i cili tash e 13 ditë është në grevë urie në burgun e qyteti Rustavi.
Qytetarë nga pjesë të ndryshme të vendit morën pjesë në protestën e organizuar nga partia kryesore opozitare, Lëvizja Kombëtare e Bashkuar, e themeluar gjithashtu nga Saakashvili.
Politikanë, artistë dhe gazetarë që mbajtën fjalime në demonstratë, e cila zgjati rreth katër orë, pohuan se Saakashvili është ndjekur penalisht për akuza të pabaza.
Duke iu drejtuar të pranishmëve, Nika Melia, udhëheqësi i Lëvizjes Kombëtare të Bashkuar, tha se Saakashvili është një politikan modern dhe i suksesshëm dhe nuk e meriton të jetë në burg.
Melia, i cili është kandidat për kryebashkiak të Tbilisit, kujtoi se rrethi i dytë i zgjedhjeve do të mbahet më 30 tetor dhe u bëri thirrje qytetarëve të dalin në votime.
Saakashvili, i cili u dënua në mungesë me akuzën e shpërdorimit të detyrës, pasi u kthye në vend pas tetë vjetësh, u arrestua më 1 tetor dhe u dërgua në një burg në qytetin Rustavi.
Autoritetet gjeorgjiane kanë deklaruar vazhdimisht se Saakashvili, i cili ishte president nga janari 2004 deri në nëntor 2013, do të arrestohet menjëherë pas mbërritjes së tij në vend.
Saakashvili akuzohet për abuzim me pozitën e tij dhe fshehje të provave për të cilat u dënua në mungesë me burgim në vitin 2018, ndërsa ai pohon se të gjitha akuzat kundër tij janë të motivuara politikisht.