Kancelari gjerman Olaf Scholz do të konsultohet me guvernatorët e 16 shteteve federale sot për hartimin e strategjisë se si të heqin kufizimet e vendosura me qëllim të parandalimit të përhapjes së COVID-19.
Numri i infeksioneve të shkaktuara nga varianti shumë ngjitës në Gjermani, por më i butë Omicron, u rrit më vonë se në vendet e tjera evropiane. Zyrtarët ia atribuuan këtë masave më të ashpra epidemiologjike.
Pasi numri i të infektuarve rishtazi ka rënë ditët e fundit, autoritetet po shqyrtojnë heqjen e kufizimeve.
Shumë shtete federale gjermane tashmë kanë hequr kufizimet si ndalimi i personave të pavaksinuar që të angazhohen në tregti jo thelbësore.
Scholz dhe guvernatorët pritet të shqyrtojnë propozimet për të hequr shumicën e kufizimeve deri më 20 mars në takimin e sotëm.
Qendra Kombëtare Gjermane për Kontrollin e Sëmundjeve ka raportuar rënie të lehtë të shkallës së infeksionit në vend, megjithëse është ende shumë mbi nivelet para-Omicron.
“Kemi kaluar kulmin e valës së Omicronit, përafërsisht pikërisht në ditën që parashikova një muaj më parë”, tha ministri gjerman i Shëndetësisë, Karl Lauterbach. Kjo, tha ai, lejon një “lehtësim modest” të masave.
Gjermania ka një shkallë relativisht të ulët të vaksinimit kundër COVID-19 në krahasim me pjesën tjetër të Evropës Perëndimore.
