Sekretari i Përgjithshëm i PS, Damian Gjiknuri ka vizituar këtë të martë qytetin e Elbasanit, nga ku nuk ka kursyer akuzat ndaj ish-kreut të PD, Sali Berisha. Gjatë inspektimit të investimieve në një nga rrugët e këtij qyteti, Gjiknuri deklaroi se Elbasani është vend i foltoreve të gjërave të mëdha dhe jo i “Foltores” së Berishës.

 

“Qytetarët e Elbasanit e kanë kuptuar që këtu ka një investim të përditshëm, ka një kujdes nga kryetari i bashkisë, por mbi të gjitha Gledi nuk  është vetë, ai është përfaqësuesi i Edi Ramës. Ne nuk e ndryshojmë dot Elbasanin pa pasur mbështetjen e qeverisë. Ne nuk duam ta kemi Elbasanin bunker politik i Sali Berishës. Sepse mëkëmbësi i tij do ta kthejë Elbasanin në foltore të Sali Berishës. Elbasani nuk është për foltore, Elbasani ka qenë foltore për arsimin, për gjëra të mëdha, por nuk është për beteja politike të Sali Berishës. Oferta jonë nëpërmjet Gledit është çdo vit ndërhyrje në çdo cep të bashkisë së Elbasanit, qoftë në qytet edhe në fshat për ta ndryshuar infrastrukturën e zonës”, u shpreh ai. 

 

Numri dy i socialistëve sëbashku me Kryetarin e Bashkisë Elbasan, Gledian Llatja u zotuan se do të vijojnë investimet në këtë zonë. Ata kërkuan besimin e qytetarëve përmes votës në 14 maj.

 

 “E dimë që  fshati është bërë si qytet, sidomos fshatrat e mëdha që i kemi të zhvilluar ekonomikisht ndaj kemi vazhduar me rrugët kryesore nuk kemi bërë asnjë ditë pushim. Ndryshe nga ato të tjerët të cilët kujtohen vetëm një muaj para fushate duke bërtitur, sikur çfarë ka ndodhur, jo që kanë 16 vite që nuk e kanë ngritur zërin njëherë, apo të vinin në Këshillin Bashkiak dhe ta kërkonin. Tani zgjohen nga gjumi dhe kujtohen se kjo punë nuk është bërë. Por ne që punojmë përditë, ne për këtë punojmë.  Të gjitha përnjëherë nuk bëhen, ato që duhet të ishin bërë për 30 vite nuk bëhen as për një, as për dy vite. Por ne jemi në rrugë të mbarë për t’i zgjidhur problematikat edhe në fshat edhe në qytet. Realisht po punojmë për këtë. Nuk po dëgjojmë zhurmat e portaleve, të foltores, të cilët dalin bërtasin, shfryjë, shajnë, dhe fusin shkopinj nën rrota. Ne po vazhdojmë punën dhe kjo është e rëndësishme për ne”, tha kryebashkiaku Llatja.

 

Dy muaj përpara zgjedhjeve vendore të 14 majit, partitë poltike po “ndezin motorrët” e fushatës elektorale. Përballë alternativës së socialistëve deri më tani ndodhet vetëm kandidati i koalicionit “Bashkë Fitojmë”, Luçiano Boçi.

Subscribe kanalin tonë në Youtube për të mos humbur asnjë video të re