Subscribe
Dënohet me tre vite burg ish-kryebashkiaku demokrat i Lezhës, Fran Frrokaj. Ai u shpall fajtor me vendim të formës së prerë nga Gjykata e Apelit në Shkodër për akuzën e “Shpërdorimit të Detyrës” për çështjen e tjetërsimit të pronave në bregdetin e Shëngjinit.
Trupi gjykues i kryesuar nga Tonin Stërkaj vendosi të ndryshojë vendimin e gjykatës së Lezhës duke i ulur një vit dënim ish-kryebashkiakut.
I njëjti dënim u dha dhe për ish-kryetarin e qarkut Gjok Ndoka. Seanca u zhvillua me dyer të mbyllura, ndërsa fajtor u gjetën dhe 16 të akuzuarit e tjerë, por me disa ndryshime nga vendimi i dhënë më herët nga shkalla e parë.
Për ish-nënkryetarin e Bashkisë Enver Hafizi dhe ish-juristin Ardenis Haxhia dënimi me burg u konvertua me shërbim prove. Ndërsa ish-futbollisti Renato Malotaj, i cili u shpall i pafajshëm u dënua nga apeli me 1 vit shërbim prove.
Hetimet për tjetërsimin e pronave në zonën e Ranës së Hedhun në Shëngjin nisën në vitin 2017. Organi akuzës arriti të provonte se 18 të pandehurit tjetërsuar 234 mijë e 548 metër katrore tokë shtetërore ranishte.
Fillimisht në këtë çështje së bashku me kryebashkiakun u arrestuan 22 persona, por në gjykatën e shkallës së parë Lezhë dosja u dërgua për 18 prej tyre. Ndërkohë pritet arrestimi i ish-kryebashkiakut, i cili mësohet dhe pse ishte i pranishëm në gjyq u lejua që të largohej drejt banesës.