Sipas procesverbalit gjyqësor, një gjykatë pakistaneze kundër korrupsionit dërgoi ish-kryeministrin Imran Khan në paraburgim policor për tetë ditë në një rast korrupsioni.
Gjykata, e cila u zhvendos përkohësisht në një shtëpi pritjeje policie në kryeqytetin Islamabad, e dërgoi ish-kryeministrin Khan në agjencinë kundër korrupsionit të vendit, respektivisht në Byronë Kombëtare të Përgjegjshmërisë.
Kjo vjen pasi qeveria federale vendosi ushtrinë në provincat Punjab dhe Khyber Pakhtunkhwa për shkak të demonstratave të vazhdueshme kundër arrestimit të Khan-it.
Ministria e Punëve të Brendshme miratoi kërkesat për trupa të qeverive kujdestare provinciale për të ruajtur ligjin dhe rendin. Vendimi erdhi pasi policia arrestoi dhjetëra aktivistë të opozitës në një goditje gjatë natës në të gjithë Pakistanin pas revoltës dhe protestave të përhapura për shkak të arrestimit të ish-kryeministrit Khan me akuza për korrupsion.
Kontigjente të forcave policore dhe paraushtarake me pajisje për trazira gjithashtu u vendosën rreth gjykatës, me të gjitha rrugët që të çojnë në vende të mbyllura.
Zyrtarët shëndetësor konfirmuan se të paktën tre persona të tjerë humbën jetën në Khyber Pakhtunkwa, duke e çuar numrin e të vdekurve në gjashtë që nga fillimi i demonstratave një ditë më parë.
Zyrtarët e policisë thanë se mbi 1.200 protestues u arrestuan gjatë demonstratave që vazhdojnë në shumë pjesë të kombit të Azisë Jugore.
Dje, një Gjykatë e Lartë në Islamabad urdhëroi arrestimin e ish-kryeministrit Khan, duke shkaktuar protesta të dhunshme në mbarë vendin, ndërkohë, veçmas, gjykata kundër korrupsionit në Islamabad sot e paditi Khan-in në një çështje që lidhet me blerjet dhe shitjet e paligjshme të dhuratave të huaja.
Avokatët e ish-kryeministrit bojkotuan seancën pasi gjyqtari në detyrë nuk pranoi të shtyjë aktakuzën në gjyq, të njohur gjerësisht si “rasti Toshakhana”.
Khan u deklarua i pafajshëm në gjyq.
Që nga arrestimi i tij dje, sipas zyrtarëve, të paktën tre persona u vranë dhe dhjetëra u plagosën në përleshjet midis punëtorëve protestues që i përkasin partisë Tehreek-e-Insaf (PTI) të ish-kryeministrit Khan dhe policisë.
Të arrestuarit përfshinin sekretarin e përgjithshëm të PTI-së, Asad Umar, ish-guvernatorin e provincës verilindore Punjab, si dhe disa ligjvënës dhe drejtues të partisë.
Sot, PTI-ja bëri thirrje për protesta mbarëkombëtare dhe mbyllje, por u distancua nga dhuna duke u bërë thirrje mbështetësve të qëndrojnë paqësorë dhe të mblidhen jashtë selisë së policisë në Islamabad, ku Khan pritet të dalë para një gjyqtari.
Interneti në celular dhe platformat e mediave sociale mbeten të kufizuara, ndërkohë shkollat në shumë pjesë të vendit për ditën e sotme janë mbyllur.
Protestuesit gjithashtu sulmuan ndërtesën e Radio Pakistanit në qytetin veriperëndimor Pashawar, si dhe plaçkitën redaksinë e saj dhe seksione të tjera të ndryshme.
Kreu i transmetuesit shtetëror, Tahir Hassan, u tha gazetarëve se qindra njerëz sulmuan ndërtesën pasi hapën hyrjen kryesore. Ai po ashtu tha se protestuesit i vunë flakën regjistrimeve dhe pajisjeve dhe se ky ishte sulmi i dytë ndaj Radio Pakistanit që nga dita e djeshme.
Më herët, lideri i PTI-së, Shah Mahmood Qureshi, tha se partia nuk ka informacion për vendndodhjen e ish-kryeministrit.
Avokati i Khan-it, Faisal Chaudhry, gjithashtu u tha gazetarëve se ai nuk ka asnjë kontakt me klientin e tij.
Khan u arrestua nga Gjykata e Lartë e Islamabadit në një nga disa dhjetëra çështjet e ngritura kundër tij që nga rrëzimi i tij në muajin prill të vitit të kaluar. Partia e tij thotë se rastet janë të motivuara politikisht.
Që kur u largua nga pushteti pasi humbi një votëbesim, Khan ka udhëhequr një fushatë për zgjedhje të parakohshme, si dhe ka akuzuar SHBA-në dhe ushtrinë pakistaneze për largimin e tij nga detyra.
Khan u arrestua në lidhje me korrupsionin e dyshuar që përfshinte Universitetin ‘Al Qadir Trust’.
Thuhet se Khan, kriketisti i kthyer në politikan dhe gruaja e tij, Bushra Bibi, morën miliarda në rupje pakistaneze dhe një pjesë të madhe toke të kushtueshme për të ndërtuar institucionin arsimor në këmbim të lirimit të një shume prej 190 milionë paundësh për një manjat pronash.
Shuma, ekuivalente me rreth 60 miliardë rupje pakistaneze, u identifikua dhe u kthye në vend nga Agjencia e Krimit të Mbretërisë së Bashkuar (NCA), pas një marrëveshjeje në vitin 2019 me manjatin e pasurive të paluajtshme, Malik Riaz.
Byroja Kombëtare e Përgjegjshmërisë, organi i Pakistanit kundër korrupsionit, pretendon se qeveria PTI e ish-kryeministrit Khan arriti një marrëveshje me manjatin që shkaktoi një humbje prej mbi 239 milionë dollarësh në thesarin kombëtar.
Megjithatë, Khan dhe drejtuesit e partisë së tij i mohojnë akuzat.
Burimi: AA
