Ish-truproja e Saimir Tahirit, Hekuran Marku do qëndrojë në burg të paktën deri në përfundim të hetimeve.

Gjykata e Posaçme ka dhënë vendimin “arrest me burg” ndaj Markut, ndaj të cilit rëndojnë akuzat e “Trafik narkotikësh”, “Pastrimi i produkteve të veprës penale”, “Grup i strukturuar kriminal” dhe “Kryerja e veprave penale nga organizata kriminale dhe grup i strukturuar kriminal”.

47-vjeçari Hekuran Marku u ekstraduar një ditë më parë nga Gjermania në Shqipëri, për tu përballur me akuzat. Ndërkohë mësohet se ish-truproja tjetër e Tahirit, Paulin Deda, është ende i lirë në Francë, pasi ka kërkuar azil politik atje dhe autoritetet franceze duke shqyrtuar kërkesën e tij. SPAK kërkoi arrestimin e tyre disa muaj më parë, pasi emrat e tyre dolën në operacionin ndërkombëtar të koduar “Shpirti”, operacion ky që vendosi në pranga biznesmenë, prokurorë dhe zyrtarë të lartë të Policisë së Shtetit, të akuzuar si pjesëmarrës në veprimtaritë kriminale të drogës.

Në 2016-ën, kohë kur ata qenë në detyrë dhe shoqërues të Tahirit sipas dy bashkëpunëtorëve të drejtësisë Marku dhe Deda kanë qenë të implikuar në trafikun e lëndës narkotike drejt Italisë. Dy skafistët e kapur nga autoritet italiane në 2016 me mbi 1000 kilogramë kanabis, përballë hetuesve Italian treguan se pronar të lëndës narkotike ishin pikërisht këta persona. Nga dëshmia e dy të penduarve duket se dy efektivët, por edhe anëtarë të tjerë të grupit përdornin detyrën e tyre si shoqërues të ministrit për të lehtësuar aktivitetin e paligjshëm.

Avokati i Hekuran Markut: Kundërshtoi përfshirjen në trafik droge, u njoh në 2015 me të penduarin e drejtësisë gjatë fushatës për PS

Hekuran Marku nuk e ka pranuar akuzën pasi është i bindur që nuk ka kryer vepra penale. Në ditët në vijim do të kundërshtojmë dhe do të paraqesim prova që ky shtetas s’ka kryer vepra penale. Me Eltjon Bregasin është njohur në fushatë elektorale të PS-së në vitin 2015 dhe nuk ka asgjë tjetër, se çfarë ka folur Bregasi, Hekuran Marku nuk ka lidhje, njohja e tij përfundon vetëm në fushatën elektorale.

Aktualisht po ndjek rrugët ligjore për të kërkuar të drejtën e tij dhe pritet të përfundojnë procedurat e ekstradimit dhe më pas të përballet me drejtësinë këtu. Në rastin konkret sot vetëm u komunikua masa e sigurisë për Hekuran Markun”, tha avokati i Hekuran Markut.

 

/faxweb