Gjykata e Tiranës ka liruar nga qelia 7 protestuesit e arrestuar për protestën e Teatrit 3 ditë më parë por Lëvizja Vetëvendosje Tiranë nuk bie dakord me masat e dhëna.
Avokatja e Vetëvendosjes, Suela Halili ka thënë se vendimet do të ankimohen dhe se janë të paligjshme. Gjykata la në arrest shtëpie vëllezërit Endrit dhe Erik Mërtirin kurse 5 të tjerët, përfshi kreu i Vetëvendosjes Tiranë, Boiken Abazi u lanë në detyrim paraqitje. Pra aktivistët e kanë të ndaluar që të marrin pjesë në protestë.
Lëvizja Vetëvendosje përmes një deklarate për mediat apeloi për lirimin e Abazit dhe aktivistëve të tjerë. “Drejtësia duhet të arrestojë dhe të hetojë përgjegjësit e vërtetë që teatrin e kishin dënuar me shkatërrim vite më parë dhe që shkelën të gjitha normat ligjore dhe kufizimet e emergjencës pandemikë për të kryer krimin. Në një shtet ligjor, pushteti nuk jep imunitet. Aq më pak kur abuzon me detyrat publike. Hetimi i shkatërrimit të teatrit është prova e zjarrit e reformës në drejtësi. Privimi i mëtejshëm i lirisë së mbrojtësve të teatrit është vetëm inkurajim për vazhdimin e padrejtësive të pushtetit politik. Të gjithë të arrestuarit duhen liruar se me trupat e tyre mbrojtën rendin kushtetues dhe ligjshmërinë në vendin tonë. U bën barrikadë ndaj projektit kriminal të tjetërsimit të pronës publike dhe keqpërdorimit të institucioneve shtetërore dhe interesave private”, thuhej në deklaratë.
Pas protestës së 17 majit, ku policia shembi godinën e Teatrit Kombëtar, u arrestuan shtetasit Boiken Abazi, Kastriot Qemaj, Sokol Ndoj, Romeo Lila, Endrit Mertiri, Burim Tafilica, Edjon Xhoxhaj, për kundërshtim të policëve dhe grumbullim të paligjshëm.
