Prokurori i Posaçëm, Alfred Shehu, ka dhënë informacione mbi goditjen e grupit kriminal të trafikut të drogës në Finlandë, që drejtohej nga shtetas shqiptarë.
Prokurori i SPAK deklaroi se janë lëshuar 11 urdhër arreste dhe janë ekzekutuar 9 prej tyre gjatë aksionit në orët e para të mëngjesit të sotëm.
Hetuesi Shehu u shpreh se janë sekuestruar 8 automjete, celularë dhe dokumente në gjuhën finlandeze në lidhje me aktivitetin kriminal të personave.
Prokurori i SPAK: Janë zbuluar dhe kapur sasi lënde narkotike edhe gjatë vitit 2024. Nga ana e SPAK është dërguar në maj kërkesa për caktimin e masës së sigurimit për 11 persona dhe nga GJKKO është pranuar kërkesa e SPAK duke caktuar masën e sigurisë arrest me burg për 11 persona. U caktua që operacioni të kryhej në orët e para të mëngjesit të sotëm, kanë marrë pjesë edhe përfaqësues të policisë finlandeze. Si rezultat u ndaluan 9 persona dhe vazhdon puna për të bërë të mundur arrestimin e dy personave të tjerë.
Gjatë zbatimit të masave të sigurimit u sekuestruan 8 automjete, telefona celularë dhe shumë dokumente, ku një pjesë e konsiderueshme e tyre janë me vlerë për hetimin sepse ka të dhëna në gjuhën finlandeze në lidhje me aktivitetin kriminal të personave.
