Policia e Shtetit njoftoi ditën e sotme arrestimin e autorëve dhe zbardhjen e grabitjes së bankës së nivelit të dytë në Koplik që ndodhi rreth një muaj më parë.
Pas njoftimit të policisë, Vizion Plus siguroi videon me pamjet e vjedhjes nga momenti që grabitësit kërcënojnë rojen e bankës, futjen në ambjentet e brendshme dhe daljen prej aty.
Në sekondat e fundit të videos, në vendin e ngjarjes shfaqet një makinë policie por ajo që bie në sy është mosreagimi.
Autorët marrin kohën e nevojshme të dalin nga banka të futen në automjetin e tyre dhe të vazhdojnë rrugën të qetë.
Edhe pse në një distancë shumë të afërt asnjë prej oficerëve të policisë nuk del jashtë për të ndërhyrë. Madje ata i hapin rrugën makinës së grabitrësve për tu larguar dhe nuk vihen në ndjekje të tyre.
Nga ana tjetër edhe pse grabitja u pa nga shumë qytetarë asnjëri prej tyre nuk reagoi për të njoftuar uniformat blu lidhur me rastin. Madje nga kamerat e sigurisë, shihet edhe një person që kalon i qetë para bankës ndonëse pa grabitësit të hynin brenda.
Policisë së Shtetit iu desh afro një muaj për të zbardhur ngjarjen dhe për të vënë në pranga autorët.