Ka mjaftuar një mesazh në telefon, që një shtetas shqiptar 52 vjeç, të bëjë për spital të bijën 15 vjeçare.
Ngjarja e rëndë ndodhi pasditen e së dielës në fshatin Acalenjo, në ishullin grek të Kretës, zilja e mbërritjes së një mesazhi në telefonin e së bijës 15 vjeçare ka sjellë reagimin e babait 52 vjeçar, i cili sapo lexoi mesazhin që i ishte adresuar së bijës, filloi ta godasë me grushte dhe shkelma, duke e dëmtuar rëndë.
Pak më vonë e mitura u dërgua në spital me plagë të rënda, ndërsa policia që u njoftua prej fqinjëve, arrestoi babain nën akuzën për dhunë brenda familjes dhe kërcënim ndaj personave të mitur.
Gjyqi ndaj babait do të bëhet sot.
Mësohet se shtetasi shqiptar, tashmë i arrestuar, përdorte shpesh dhunë ndaj bashkëshortes dhe fëmijëve të tij, ndërsa është përdorues i shpeshtë i alkoolit.
Emri i autorit për momentin nuk bëhet publik, por gjatë ditëve në vazhdim, prokuroria e Kretës pritet të urdhërojë publikimin e të dhënave dhe fotove të tij, praktikë që përdoret shpesh për autorët e akteve të dhunës ndaj të miturve.
