Një kontejner që mbante sende thelbësore për foshnjat e porsalindura dhe nënat e tyre, duke përfshirë reanimatorë dhe furnizime të tjera kritike, u grabit në Port-au-Prince të shtunën, tha në një deklaratë agjencia e ndihmës UNICEF, ndërsa dhuna e bandave dhe një krizë humanitare përkeqësohen në kryeqytetin Haitian.
Më shumë se 260 kontejnerë me ndihma humanitare në port tani kontrollohen nga grupe të arm
atosura që depërtuan në portin kryesor javën e kaluar, shtoi agjencia e fëmijëve të OKB-së.
Vjedhja e furnizimeve “ndodh në një moment kritik kur fëmijët kanë më shumë nevojë për to”, tha përfaqësuesi i UNICEF-it Bruno Maes në Haiti.
“Plaçkitja e furnizimeve që janë thelbësore për mbështetjen e fëmijëve për shpëtimin e jetës duhet të përfundojë menjëherë dhe aksesi humanitar duhet të mbetet i sigurt”, shtoi Maes.
Privimi i fëmijëve nga furnizimet jetike shëndetësore mes një sistemi shëndetësor në kolaps është një shkelje e të drejtave të tyre.
Që nga janari, dhuna në Haiti ka përkeqësuar një sistem tashmë të shkatërruar të kujdesit shëndetësor.
Sipas UNICEF-it, tre nga katër gra dhe fëmijë në zonën e Port-au-Prince nuk kanë akses në shëndetin publik dhe ushqimin bazë.
Në kryeqytet ekzistojnë vetëm dy ambiente funksionale kirurgjikale.
Gjashtë nga dhjetë spitalet në të gjithë vendin nuk janë në gjendje të funksionojnë për shkak të mungesës së energjisë elektrike, karburantit dhe furnizimit mjekësor.
Haiti ka luftuar për të zgjidhur një krizë të gjatë politike dhe humanitare dhe 80 për qind e Port-au-Prince aktualisht kontrollohet nga bandat, sipas vlerësimeve të OKB-së.
Brenda vendit, mbeten pak hapësira të sigurta. Të gjitha rrugët që të çojnë jashtë Port-au-Prince këto ditë janë bllokuar nga bandat. Policia kombëtare ka luftuar, por me burime të kufizuara.
Të gjitha akseset në portet dhe aeroportin ndërkombëtar janë bllokuar.
Asgjë nuk po hyn. Dyqanet ushqimore po mbarojnë pa ushqim, pompat e benzinës nuk kanë karburant dhe spitalet kanë mungesë gjaku.
“Dështimi për të ndaluar dhunën dhe rihapjen e rrugëve kritike të logjistikës do të përkeqësojë ndjeshëm krizën e kujdesit shëndetësor,” tha Maes.
“Ne jemi dëshmitarë të një katastrofe humanitare.”/
