Rrjeti social popullor Facebook hoqi të mërkurën një video në të cilën Presidenti amerikan Donald Trump thotë se fëmijët janë “pothuajse imun ndaj COVID-19”.
Shpjegimi i Facebook për këtë veprim është se videoja shkelte rregullat e kompanisë kundër përhapjes së dezinformatave për llojin e ri të koronavirusit.
“Kjo video përmbante pretendime të rreme në lidhje me imunitetin e pretenduar të një grupi të veçantë ndaj COVID-19, që është një shkelje e politikës sonë e drejtuar kundër përhapjes së dezinformatave për sëmundjen,” tha një zëdhënës i Facebook.
Kjo është hera e parë që ata hoqën një njoftim të Trump për shkak të dezinformatave për koronavirusin.
Shtëpia e Bardhë nuk e komentoi këtë veprim të Facebook.
Më parë, Twitter reagoi ndaj postimeve të Trump në disa raste duke i bllokuar ato.
